A comarca de Pontevedra non será allea ao envellecemento da poboación que vivirá toda a Comunidade autónoma galega na próxima década, no entanto, será unha das zonas de Galicia nas que o peso dos habitantes maiores de 65 será menor. É dicir, unha das comarcas máis novas de Galicia. Isto non impedirá que a poboación de persoas maiores de 65 anos creza en 2.095 persoas entre 2012 e 2017, segundo as proxeccións elaboradas polo Instituto Galego de Estatística.
Calcúlase que a comarca administrativa de Pontevedra (que integra os municipios da capital, Barro, Campo Lameiro, Cotobade, Poio, Vilaboa, Ponte Caldelas e A Lama) terá en 2017 un total de 120.071 habitantes. Será a comarca galega, xunto a de Santiago e O Morrazo, cun índice de envellecemento máis baixo. Ademais, é das poucas comarcas que dentro dun lustro continuará gañando poboación con respecto ao ano 2012. Das 54 nas que está dividida a comunidade autónoma galega, tan só aumentarán o seu número de habitantes un total de 11 áreas, entre elas a pontevedresa.
O crecemento da poboación céntrase na contorna das grandes cidades atlánticas, mentres que o interior galego e zonas de costa da provincia da Coruña perden habitantes. Así, na provincia da Coruña tan só gaña habitantes a comarca da capital herculina, con 12.973 veciños máis en 2017; e a de Santiago, que sumaría outros 5.054 habitantes na área de Compostela. Descenderían o resto das comarcas da provincia e é significativo o caso de Ferrolterra, que perdería 2.200 habitantes.
Con pequenas excepcións, o descenso tamén é xeneralizado nas provincias de Ourense e Lugo. Ademais, as comarcas que lideran ambas as capitais tamén perderían poboación, 1.688 e 1.035 veciños respectivamente.
A provincia de Pontevedra é a que presenta uns mellores balances. A comarca de Vigo é a que máis crecería en habitantes, un total de 7.909; seguida dos xa mencionados 1.737 habitantes que gañaría a área de Pontevedra. Tan só tres comarcas perderían poboación no próximo lustro (Deza, A Paradanta e Tabeirós-Terra de Montes) na provincia. Caldas incrementaría o seu saldo poboación en só 11 persoas, O Morrazo en 380 e O Salnés en 1.404.
Volvendo á comarca pontevedresa, o menor índice de envellecemento con respecto á media galega explícase en gran medida pola elevada taxa de natalidade que presenta. Se non cambian as tendencias, o IGE prevé que no ano 2017 prodúzanse na comarca 1.028 nacementos fronte a 1.081 defuncións. Aínda que o saldo vexetativo sería lixeiramente negativo, non se produce o esborralle que podemos atopar noutras zonas de Galicia.
De feito, será unha das poucas comarcas nas que, ademais de crecer o número de persoas maiores de 65 anos increméntese tamén o de menores de 20, en máis de medio milleiro. Calcúlase que en 2017 vivan na área de Pontevedra un total de 21.874 menores de 20 anos fronte aos 21.285 da actualidade.
Caerá con todo o número de poboación adulta de entre 20 e 65 anos de idade, en case un milleiro de persoas, con respecto ás cifras actuais. En 2017 calcúlase que 73.431 veciños atópense entre estes rangos de idade, que sería a época “mais produtiva” por así dicilo, dun ser humano. Por último, pasarase de 22.671 maiores de 65 anos a 24.766. É dicir, contabilizaríanse, aproximadamente, tres persoas en idade de traballar por cada unha en idade de xubilación.
Segundo os datos do IGE, tamén se detecta un envellecemento entre a poboación de máis idade, xa que aumentaría en 619 persoas o grupo de maiores de 85 anos, ata alcanzar os 3.476 dentro de cinco anos.