O vindeiro Luns, 23, todos os/as veciños/as que poidan e desexen doar sangue,
sabede que a unidade mobil encontrarase frente o centro de saúde, no San Antoniño, das 16:15-21:00.
Moitas grazas, lembrade que só 10 minutos salvan vidas.
Mais información no 900 100 828.
Outra vez recibimos unha carta que nos fixo moita ilusión. Trátase dunha invitación dos alumnos de
5º de primaria do CEIP Amor Ruibal para que presentemos un candidato@ para o VII Premio “MIMI“ ao personaxe do ano”.
A súa finalidade é recoñecer e premiar a aqueles personaxes da comunidade que na súa vida utilicen e fomenten o idioma galego e a súa cultura.
O premio MIMI consiste nunha figura en madeira realizada polo artista local Francisco José Rodríguez Remiseiro co logotipo do CEIP “Amor Ruibal”, e seralle entregado ao/á gañador/a en maio do 2015 no marco da celebración das Letras Galegas.
Dende Novas de Barro propoñemos á “ASOCIACIÓN CULTURAL BAROSA”. Proposta que xa se fixo no 2014 despois de facer unha enquisa na que resultou a opción máis votada, pero debido a diversas causas, a candidatura foi presentada “fóra de prazo” e non se pudo cubrir a investigación por parte do alumnado.
Premiados en anos anteriores:
VI PREMIO MIMI: A cantautora coruñesa Mª Xosé Silvar “SÉS”.
V PREMIO MIMI: A rapeira viguesa AÍD
IV PREMIO MIMI: Pili, a educadora social do Concello de Barro.
III PREMIO MIMI: Cantereiras de Ardebullo,
II PREMIO MIMI: Xabarin club
I PREMIO MIMI: Ezequiel Mosquera .
BBBB
Noticias de Barro
A Comisión 6ª do Parlamento Galego debaterá mañá mércores ás 16:50 h. unha Proposición Non de Lei presentada pola deputada do BNG Montserrat Prado para que se mellore a seguranza viaria na PO-531 entre Curro e Pontevedra.
Da recente resposta escrita remitida pola Consellaría de Medio Ambiente, Territorio e Infraestruturas conclúese:
1) Que se deixa todo a expensas das disponibilidades orzamentarias e da construción da A-57. Mentres a Consellaría realizou unicamente unhas actuacións puntuais que poden se calificados como meros parches. Máis alá das declaracións dos responsabeis da Consellaría, o certo é que practicamente todas as semanas se produce algún tipo de accidente nesta estrada, e que non se pode demorar por máis tempo unha solución eficaz aos evidentes problemas de seguranza viaria que padece.
2) Que a Consellaría se nega a construir pasos de peóns nunha estrada tan densamente poboada, argumentando que non serían seguros. Obvian os representantes da Consellaría que existen medios técnicos su ficientes e contrastados para calmar o tráfico e conseguir pasos de peóns seguros. Se non se fai é única e exclusivamente por falla de vontade política.
3) Que a Consellaría non ten pensado facer nada para liberar o treito da AP-9 de peaxe
, argumentado que é unha vía competencia de Fomento. A pesar desta evidencia, esquécese que é a súa obriga facer as xestións que sexan precisas diante do ministerio para conseguir esta demanda histórica. Sen ir máis alá compre lembrar que esta foi unha promesa realizada nas pasadas eleccións galegas polo tandem Hernández-Feijoo-Ana Pastor. Se nada podía facer a administración galega, a que viña tal promesa?
Ante a ausencia de compromisos concretos, o BNG continuará a demandar da consellaría que se adopten as medidas seguranza viaria comprometidas no seu día cos colectivos veciñais e as forzas políticas. Non é de recibo que sabendo o que hai que facer a consellaría fique de brazos cruzados mentres os usuarios e usuarias da N-531 se xogan a vida un día si e outro tamén.
Pontevedra, 9 de decembro de 2014
Asdo: Anxos Riveiro
As veciñas e veciños de Barro xa nos estamos malacostumando a, dun ou outro xeito, pagar as chapuzas que unha e outra vez cometen o alcalde e o goberno do PP en Barro.
Ao longo dos máis de 30 de goberno do PP en Barro son moitos os casos nos que distintas administracións e xulgados ditaminaron que actuacións levadas a cabo polo goberno municipal eran ilegais, o que levou acarreado multas e perder os cartos que se investiron nelas.
O caso da ponte de Valbón non é novo. Xa o concello pagou miles de euros en multas por construila sin ningún permiso e de forma ilegal.
Agora a Axencia de Protección da Legalidade Urbanística, organismo dependente da Xunta de Galiza, (tamén gobernada polo PP, para que o alcalde non fale de persecución) ven de ordear a sua demolición, por ser construída sen ningún tipo de tramitación administrativa e en terreo rústico.
Que autoridade pode ter o alcalde para obligar aos veciños do concello a cumprir coa legalidade urbanistica, e pagar os impostos derivados das obras que queiran realizar, co exemplo que él lles dá?
O informe da Axencia é demoledor, calificando de ilegalizábel a ponte e afirmando que é incompatíbel co ordenamento urbanístico, co que compromete o intento do PP de legalizala a traves dunha modificación do planeamento.
Esta nova chapuza do PP saelle cara aos veciños, xa que o gastos que implica saen dos orzamentos municipais. A brutal subida de impostos que acordou o PP nos últimos anos están sendo utilizados precisamente parapagar as deudas acumuladas ao longo de moito tempo, e o que é máis inaceptabel, para pagar as chapuzas e caprichos dun alcalde incapaz de dar resposta ás necesidades dos veciños e veciñas.
Barro a 20 de novembro de 2014
Asdo: Xosé Manuel Fdez. Abraldes.
Deputación de Pontevedra ingresará dez millóns de euros pola venda de parcelas ás empresas 
Supermercados Froiz e Autocares Novas Rías, según manifestou o presidente da institución provincial, Rafael Louzán, este venres en rolda de prensa.
O vindeiro mes de xaneiro abrirase o prazo para que durante todo o ano 2015 as empresas interesadas poidan adquirir terreo no polígono de Barro Meis.
A xunta de goberno da Deputación de Pontevedra aprobou ademais o proxecto para construir un Centro de Servizos e Apoio Empresarial no polígono industrial cun orzamento de 898.000 euros e un prazo de execución de oito meses.
Unha vez adxudicado o Viveiro de Empresas que acollerá no parque industrial a novos emprendedores e unha vez que o polígono acadou unha porcentaxe de ocupación do 50%, a Deputación quere complementar o desenvolvemento urbanístico do parque cun Centro de Servizos e Apoio ás empresas instaladas que, ao tempo, proporcione novos espazos para a celebración de reunión, salas, auditorio, servizo de restauración, cafetería e outros.
O presidente da Deputación afirmou que o polígono de Barro-Meis será un polo de atracción de empresas e para a creación de emprego pois a ubicación nel de Supermercados Froiz actuará de locomotora para a implantación de novas empresas, moitas delas complementarias da súa actividade.
O prazo de presentación de ofertas para ocupar o polígono de Barro-Meis finalizou onte coa recepción de dúas únicas ofertas: unha do grupo Distribucións Froiz e outra de Novas Rías, unha empresa con sede en Poio que se dedica ao transporte de viaxeiros en autocares.
A máis suculenta é a presentada polo imperio fundado por Magín Froiz, que pretende adquirir 72.000 metros cadrados de chan industrial valorados en algo máis de 7,5 millóns de euros. A Deputación calcula que o volume requirido traducirase na ocupación de entre 17 e 22 parcelas, pero todo dependerá das necesidades de superficie que se detecten na proposta o vindeiro luns, cando se procederá á apertura de sóbrelos.
Pola súa banda, Novas Rías solicitou unha soa parcela de 1.800 metros cadrados para construír unha nave que sirva de garaxe para os seus medios de transporte. Devandita proposta requirirá dun investimento duns 190.000 euros, dado que as bases do concurso estableceron un prezo de 105 euros máis IVE por metro cadrado.
Poderían aparecer máis
A pesar de que o prazo expirou, a institución provincial podería recibir máis ofertas a través de correo postal e electrónico, modalidades para as que se concederon uns días máis de espera.
No entanto, todo fai presaxiar que a pretensión de ocupar o 100% de Barro-Meis caerá en saco roto. O polígono conta cunha superficie de 237.354 metros cadrados repartidos en 77 parcelas, das que só once foron ocupadas. Anos logo da súa construción, permanecen vacantes 66 e é moi probable que o concurso en fase de tramitación conclúa con terreos libres. Froiz e Novas Rías apenas superan coas súas ofertas o 30% da superficie do polígono, pese ao intento da Deputación de ofrecer prezos razoables e facilidades de pago, coa posibilidade de pagar as parcelas nun prazo de 15 anos.
A única saída á vista para garantir o funcionamento ao 100% do polígono é a construción do porto seco proposto pola propia institución para salvar a sentenza que ordena retirar os recheos do Porto de Marín. Iso si, a alcaldesa marinense María Ramallo, xa advertiu de que os empresarios só aceptarán propostas con peirao e nin en Barro nin en Meis hai auga salgada.
Mañá xoves 18 de setembro sairá ao público o novo proxecto de Viña Moraima S.Coop.Gal: Moraima Caíño 2013. Trátase dun viño monovarietal 100% caíño tinto amparado pola Denominación de Orixe Rías Baixas, do que só chegarán ao mercado, desta primeira colleita, 2229 botellas, resultado dun grande esforzo de recuperación de viñedo local, nalgúns casos centenario. En palabras de Roberto Rivas, Vicepresidente da cooperativa, a elaboración dun caíño era unha débeda pendente con Barro, onde tradicionalmente foi o viño máis recoñecido pola súa calidade, e a necesidade dun delicado cultivo e posterior vinificación.
A presentación terá lugar no Pazo da Crega, en San Antoniño, Barro (Pontevedra) a un quilómetro da sede da adega, onde Roberto Taibo e Cristina Yagüe, enólogos responsables da elaboración, explicarán o proceso de xestación do primeiro tinto de Viña Moraima. A recoñecida sumiller afincada en Lugo, Mercedes González, realizará unha cata comentada que poderá ser seguida por todos os asistentes á degustación. Os socios quixeron compartir este importante fito na súa pequena, mais intensa, historia como cooperativa, con hostaleiros, distribuidores e diversos cargos públicos.
Seguindo coa ampla presenza en medios sociais da adega, o evento poderá ser seguido tanto nas súas contas oficiais, como na dos blogueiros convidados ao evento, coa etiqueta #MoraimaCaíño.
NOTICIAS DE BARRO 