Degustación de viños e mariscos do 11 o 14 de xuño en horario de 20:30 a 24:00 no Pazo da Crega.

               ¿GRATIS?

A ultima agresion o cruceiro de Soutelo situado no camiño portugues perto do lugar de Faxil na parroquia de Agudelo,,,non gardan a distancia de seguridade cando aran terra co tractor e romperon un anaco da pedra da base do cruceiro …como sigan asi ata poden chegar romper o baral.

B. MÁRQUEZ – PONTEVEDRA O resultado estaba escrito de antemán. O pleno da Deputación de Pontevedra deu onte luz verde, cos votos do PP en solitario, á aprobación inicial do orzamento da institución para este ano. Un orzamento que ascende a 152,7 millóns de euros, 15,7 millóns máis (11,4%) que o de 2011.
BNG e PSdeG-PSOE votaron en contra da proposta, despois de que os deputados populares tombasen todas as emendas presentadas polo grupo nacionalista, as cales tampouco obtiveron o respaldo dos socialistas que optaron, neste caso, pola abstención.
Foi o vicepresidente económico José Manuel Figueroa o encargado de presentar e defender o proxecto orzamentario ao que definiu como unha perfecta combinación de “austeridade e compromiso co crecemento”. Neste contexto citou expresamente a aposta polos emprendedores que se queiran instalar no polígono industrial de Barro-Meis que promove a Deputación aos que se destinará unha partida de 150.000 euros.
O portavoz popular recalcou que eran unhas contas “realistas e previsoras” e sobre todo “orientadas cara aos cidadáns”.
Asímismo entre os valores que puxo sobre a mesa destacou a diminución en 4,6 millóns de euros do capítulo de persoal e sobre todo a reserva de 52 millóns para investimentos realizados nos concellos e o compromiso e a vontade política de chegar, nun prazo de seis anos, a un nivel de débeda cero na Deputación.
José Manuel Figueroa aproveitou a súa intervención para animar aos grupos da oposición (BNG e PSOE) a achegar ideas para “buscar a mellor fórmula para disolver os actuais organismos autónomos e integralos na Deputación”.
Valoración da oposición
César Mosquera e Santos Héctor Rodríguez –portavoces provinciais do BNG e PSdeG-PSOE– coincidiron en criticar o pouco tempo que tiveron para analizar o proxecto orzamentario pois lles entregaron a documentación “incompleta e confusa” catro días antes do seu debate no pleno.
O nacionalista César Mosquera puxo en cuestión a anunciada austeridade xa que “os gastos correntes (capítulo II e IV) increméntanse e mentres recomendan aos concellos recortar a política de cheques (transferencias correntes) aumenta a súa dispoñibilidade”.
Tamén cuestionou abertamente o obxectivo de débeda cero en seis anos xa que con, as cifras achegadas polo propio goberno provincial, “a amortización da débeda acabará no 2022” e ademais os ingresos da institución, inusualmente altos este ano, caerán nos exercicios sucesivos pola previsible caída do diñeiro do Estado e pola obrigación de reintegrar as liquidacións negativas dos anos 2008 e 2009.
O portavoz nacionalista acusou o goberno de Rafael Louzán de “encartarse aos designios de Madrid”. Unha acusación que avalou coa serie histórica dos orzamentos da Deputación: “cando goberna o PP en Madrid recortan e cando non, tiran do crédito. Só hai que ver as contas do período 1996-2004 (goberno de Aznar) e as que nos presentan hoxe”.
Igualmente puxo en cuestión o plan de investimentos nos concellos. “Non hai transferencias aos concellos senón actuacións directas da Deputación” o que, Mosquera Lorenzo, considera unha usurpación das competencias municipais. “É unha proposta revolucionaria” ironizou “xa que expoñen a eliminación dos concellos, total xa están os investimentos que fai a Xunta, as da Deputación… para que mantelos?”.
Aínda a pesar destas críticas, que aumentaron á hora de falar da supresión dos organismos autónomos, “se queren elaborar un plan de racionalización da Deputación estamos dispostos a colaborar”, ofreceu o portavoz do BNG.
Pola súa banda Rodríguez Díaz, en nome do grupo socialista, bota de menos nos orzamentos presentados un compromiso “real” co emprego e neste sentido lamentou que non se valorou a moción presentada para elaborar un plan director de emprego. Ademais, do mesmo xeito que o portavoz nacionalista, criticou que “se queiran facer os investimentos nos concellos desde aquí”.
O vicepresidente provincial José Manuel Figueroa tachou de “decepcionantes” as críticas expostas pola oposición e recalcou que “o importante é que as obras e os investimentos cheguen aos concellos, ao cidadán dálle igual quen as faga”.
O futuro dos organismos autónomos agrea o debate
Optimizar recursos e gañar en eficiencia ou intento de ter todo baixo un control absoluto? A disxuntiva planeou sobre a agre polémica suscitada no pleno da Deputación ao redor da proposta de supresión dos organismos autónomos e a súa integración na estrutura da institución.
A desaparición dos citados organismos, “que non das súas marcas”, será unha realidade o 1 de xaneiro de 2013 polo que o goberno provincial ten por diante seis meses para articular a integración desexada. Onte o vicepresidente provincial José Manuel Figueroa pedía á oposición (PSOE e BNG) a súa colaboración para levar este proxecto a bo porto.
Os organismos a suprimir son o ORAL (organismo de recadación da administración local), o Museo Provincial, a Escola de Canteiros, a Escola de Enfermería, o Ipespo (instituto de promoción de só industrial) e a Caixa de Anticipos.
Figueroa insistiu na necesidade de “avanzar” e “optimizar” os recursos públicos e de racionalizar os gastos. Mosquera Lorenzo, rexeitou de plano estas bondades e sostivo que detrás desta medida está o ánimo de ter todo baixo control.
O portavoz nacionalista utilizou o caso do Museo para exemplificar a súa oposición. “Creado en 1927, sempre foi uns organismos autónomo e nunca creou problemas”. É esta “certa autonomía o problema” , apuntou e por iso e para desautorizar ao seu director nomeáronse dous “superiores”: un director de xestión e unha administrativa que estarían a dirixir a modo de comisarios políticos e sen criterios profesionais o Museo.
“Sotto voce fálase de volver á funcionalidade orixinal e aí enténdese que os miliarios, señalizadores de rutas e distancias, quéiranse levar ás rotondas; os dólmenes, monumentos funerarios, aos cemiterios e a prensa, aínda a de 1923 aos bares…” relatou, non sen sarcasmo, Mosquera quen tamén tivo diseccionó a situación doutros organismos.

Nunha superficie aproximada de hectarea e media, situada en monte veciñal da parroquia pontevedresa de Alba, a Asociación de Veciños A Capela presentou  un proxecto, para a creación dun Parque Forestal Galego. A localización sería no lugar da Devesa, nun espazo próximo ás instalacións da ITV de Curro-Barro.

É unha superficie abandonada, utilizada habitualemente como vertedoiro incotrolado, que se pretende recuperar para o uso e desfrute dos veciños cunha actuación que pasaria por; o repoboación forestal con especies autóctonas e a creación dun area de recreo coa dotación necesaria de mobiliario urbano, unha fonte central e un sendeiro a xeito de paseo.
Agora, segundo o presidente da asociación veciñal, Sabino Cancela, queda o mais dificil, “procurar os recursos económicos para desenvolver o proxecto, que xa conta co apoio do concello de Pontevedra,”.

boletín barro-xuño 2012

O Premio Mimi é un recoñecemento a aquelas persoas que usan e defenden o uso do idioma galego. Partindo dunhas bases elaboradas polo Equipo de Normalización Lingüística, o alumnado de 5º solicitou por escrito as candidaturas, enviando cartas a distintos organismos, asociacións e institucións.
Recibidas as propostas, no segundo trimestre do curso @s alumn@s investigaron, recolleron información e elaboraron carteis e presentacións audiovisuais para dalas a coñecer ao resto do alumnado e profesorado do centro. Logo da votación, saíu gañadora Pili Álvarez, proposta polo Obradoiro Río Umia, impoñéndose aos outros tres candidatos, que foron: Avelino Pousa Antelo, proposto pola Área de Normalización Lingüística da Universidade de Vigo, Luís Tosar, proposto pola Facultade de Filoloxía e Tradución da Universidade de Vigo, e Xesús Ferro Ruibal, proposto pola Real Academia Galega.
Na primeira edición, o gañador foi Ezequiel Mosquera; na segunda, o Xabarín Club, e na terceira, As Cantareiras de Ardebullo.
O Premio consiste nunha réplica en madeira de MIMI, a mascota do colexio, realizada polo artista local Fran Remiseiro, baseada no debuxo da alumna Aroa Outón

Pontevedra está situada nunha comarca moi rica an xacementos arqueolóxicos. Só no que se refire a arte rupestre ao aire libre, calcúlase que en contorna da capital provincial -desde Cotobade ata A Lama, pasando por Campo Lameiro, Marín, Ponte Caldelas, Barro ou Poio- alberga aproximadamente o 60 % dos vestixios que se conservan en toda a Península Ibérica.

O propio municipio da capital non é unha excepción, e conta con nada menos que 85 elementos arqueolóxicos catalogados no inventario oficial da Xunta de Galicia. Pero se pensa que «posiblemente hai moitos máis», segundo indicou onte o concelleiro responsable de Patrimonio Cultural, Luis Bará.

Este destacou que só nos últimos meses comunicáronse no Concello nada menos que dez novos descubrimentos neste campo. Bará non quixo concretar moito máis, xa que os restos teñen que pasar un complexo proceso para certificar a súa autenticidade. O Concello recolle o aviso do achado -na súa maior parte procede de comunidades de montes- e trasládao á Xunta de Galicia. Son os técnicos da Consellería de Cultura quen teñen que certificar que os restos merecen ser incluídos no catálogo patrimonial e optar, polo tanto, a algún tipo de protección.

Bará apenas explicou que se localizaron vestixios inéditos en parroquias como Mourente, Salcedo, Campañó ou Lourizán, e que entre os achados hai petróglifos, mámoas, e incluso o que poden ser os restos dunha torre defensiva medieval, localizada na ladeira do monte Castrove.

Bará, que onte presentaba o Plan de Patrimonio Cultural das parroquias do rural pontevedrés, destacou que esta insólita fervenza de avisos de achados «revela un cambio de actitude da sociedade en relación ao patrimonio cultural. Ata hai ben pouco se pensaba que este tipo de cousas soamente lle interesaban aos expertos; agora, xa existe unha implicación de moita máis xente».

Outro exemplo que citou neste mesmo sentido é un escrito do CEIP Carballeira, en Lourizán, que solicitou ao Concello a restauración duns petróglifos localizados no interior do recinto escolar.

Precisamente, fomentar a posta en valor de todos os elementos que forman parte do patrimonio cultural é un dos obxectivos primordiais do plan presentado onte polo Concello, que terá unha vixencia de cinco anos e para o que Bará pretende «movilizar recursos técnicos, materiais e económicos contando con distintas institucións, programas europeos e, incluso, a implicación das entidades sociais que poden achegar outro tipo de colaboracións que non sexan diñeiro».

O plan inclúe varias áreas de traballo: o desenvolvemento dunha liña estratéxica común e de actuacións en zonas concretas; a catalogación e proxección do patrimonio cultural; a súa conservación e restauración; sensibilización e divulgación; e, para rematar, promover un aproveitamento socioeconómico, xa que Bará defende «a necesidade de que todo este patrimonio supoña un retorno económico para o municipio ao incrementar as visitas; e ao tempo aumente o orgullo e a autoestima».

http://www.asociacionbarosa.org/patrimonioarqueoloxico.htm