A temporalidade monopoliza os 5.500 novos contratos de agosto
Corre entre os mozos unha broma acerca da suposta existencia de contratos indefinidos. Din que os hai, aínda que ninguén os viu. A pesar de non ser obxecto de broma, o certo é que resulta cada día máis difícil atopar un. E máis aínda asinalo. E que leve o nome dun. Polo menos, na comarca de Pontevedra, aínda que é unha constante en case toda a comunidade e o Estado. Proba diso é que a práctica totalidade dos contratos asinados durante o mes de agosto na área de influencia da cidade do Lérez foron de carácter temporal. Das 5.462 novas contratacións de persoal realizadas o pasado mes, 5.204, é dicir, o 95,27 %, son temporais, e menos do 5 % indefinidos.
O municipio de Pontevedra liderou o número de ambos, tanto dos de duración determinada como dos de indeterminada. De feito, preto da metade do total, 2.588 (o 47,38 %) realizáronse no municipio de Pontevedra, seguido de Marín con 1.101, Sanxenxo con 760, Bueu con 356, Poio con 208, Ponte Caldelas con 171, Moraña con 89, Barro con 60, Cotobade con 57, Cerdedo con 41, Campo Lameiro con 18, e A Lama con 13.
Dispárase o sector servizos
Por sectores, volveu destacar, cunha ampla vantaxe respecto ao resto, o de servizos, que acaparou o 81,73 % dos novos empregos da área de influencia da cidade do Lérez. Foron en total 4.464 contratos asinados en agosto, fronte aos 608 correspondentes á industria, os 277 da construción, e os 113 restantes da agricultura. Resulta curioso que, incluso no campo dos servizos, o municipio de Marín volva superar en contratación ao de Sanxenxo, con 828 fronte aos 726 do municipio turístico. Certo é que este campo laboral non abarca só a infraestrutura hostaleira, aínda que si ocupa o seu maior parte.
Estas cifras supoñen, no entanto, un notable descenso -dun 36,93 %- en comparación co mes de xullo. Os empregos relacionados coa agricultura foron os que máis sufriron o paso do ecuador do verán, xa que a diminución foi neste área do 63,9 %, mentres que no sector servizos a baixada foi do 38,5 % e na construción e industria, do 21,53 e o 17,39 %, respectivamente.
De feito, foi precisamente Sanxenxo o municipio que máis acusou a caída dun mes a outro, cun 66,52 % (1.510) menos de contratos. Pontevedra saldouno cun 17,61 % (553) de descenso e, no extremo contrario, Cerdedo destacou cun incremento do 46,43 % (13). O resto de municipios perderon entre os 697 empregos de Marín e os 9 que gañou Ponte Caldelas, pasando polos 150 que descendeu en Poio e os 264 en Bueu.
Máis industria que no 2013
Respecto ao ano pasado, as cantidades arroxan, con todo, un incremento que, no caso da comarca, suma o 4,12 %, o que se traduce en 216 contratos máis.
A industria é o sector que acapara o gran mérito do crecemento, cun 84,8 % de incremento, seguido de lonxe pola construción, cun 8,63 %, e o sector servizos, cun repunte do 1,29 %. No polo oposto atópase a agricultura, que sufriu unha caída do 55,69 % en comparación co mesmo mes do exercicio anterior.
Comarca: 5.462
Novas altas
Pontevedra acaparou case a metade das novas altas, seguida de Marín e Sanxenxo.
Julio : -36,9 %
Importante caída
O descenso no número de novos contratos estivo liderado pola agricultura.
2013: 4,12 %
Mellora interanual
A industria incrementou a súa contratación un 84,8% desde o ano pasado ao actual.
NOTICIAS DE BARRO 