Os programas de fomento do emprendemento da Deputación de Pontevedra “DepoEmprende II” e “DepoEmprende 2017” chegan entre o mércores 17 e o venres 19 de xaneiro a un total de seis concellos da provincia de Pontevedra (Cangas, Ponteareas, O Porriño, Barro, Pontevedra e Vilagarcía de Arousa) con xornadas de presentación destes proxectos. As persoas interesadas deberán inscribirse a través dos formularios dispoñibles na páxina web da institución provincial.

De cada unha destas xornadas sairán 15 das persoas que participarán en cada un destes programas ata chegar ao total de 120 prazas para “DepoEmprende 2017” (todas as persoas desempregadas, con prioridade a distintos colectivos) e 135 para “DepoEmprende II” (menores de 30 anos).

Deste xeito, as primeiras quendas serán as seguintes: o mércores 17 no Concello de Cangas (no Salón de Plenos da Casa consistorial) e en Ponteareas (no Centro de Desenvolvemento Local), en ambos os dous casos sobre “DepoEmprende II”. O día seguinte, o xoves 18, as presentacións terán lugar no Porriño (no Multicentro de Torneiros), sobre “DepoEmprende II”, e no viveiro de empresas do Polígono de Barro (sobre “DepoEmprende 2017”). Por último, o venres 19 acollerán dúas presentacións o Concello de Pontevedra (no Edificio administrativo da institución provincial) e outras dúas en Vilagarcía de Arousa (na Cámara de Comercio), con formación sobre os dous proxectos. As quendas de “DepoEmprende II” serán entre as 12:30 e as 14:00 horas e, as de “DepoEmprende 2017”, entre as 10:00 e as 11:30 horas.

“DepoEmprende 2017” (cun orzamento de 393.129 euros) oferta 120 prazas para todas as persoas desempregadas da provincia, dando prioridade ás menores de 30 anos, ás mulleres, aos maiores de 45 anos, persoas con algunha diversidade funcional ou persoas pertencentes a colectivos en risco de exclusión social. A través deste proxecto impartiranse un total de oito accións formativas en seis localizacións da provincia: dúas en Pontevedra e Vigo e unha en Tui, Vilagarcía de Arousa e Barro. Estes obradoiros formativos teñen por obxectivo mellorar as capacidades das mozas e mozos que queiran ser emprendedoras e emprendedores, achegándolles formación e asesoramento e, por outro lado, loitando contra o despoboamento do medio rural da provincia fomentando a igualdade de oportunidades no acceso á formación.

Pola súa banda, “DepoEmprende II” (cun orzamento de 552.235,93 euros) oferta 135 prazas e está destinado a persoas desempregadas menores de 30 anos. A través deste proxecto impartiranse nove accións formativas: dúas en Pontevedra, Vigo e Vilagarcía de Arousa e unha en Cangas, O Porriño e Ponteareas. Xunto a estas accións tamén se levará a cabo un obradoiro de motivación e promoción do emprendemento en cada unha das localizacións, nos que poderán participar ata un máximo de 150 persoas.

Ademais as persoas participantes, tanto nos cursos do programa “DepoEmprende 2017” como “DepoEmprende II”, recibirán formación apta para a consecución do certificado oficial de profesionalidade ADGD0210 “Creación e xestión de microempresas”, do módulo MF1788-3 de “Planificación e iniciativa emprendedora en pequenos negocios e microempresas”. As accións terán unha duración de 144 horas durante as cales se impartirán contidos transversais en técnicas, ferramentas e metodoloxías áxiles e innovadoras para o emprendemento como Desgin Thinking e Lean Startup (20 horas), detección de oportunidades vencelladas ao perfil profesional (4 horas), actitude emprendedora e oportunidades de negocio (40 horas), proxecto e viabilidade do negocio ou microempresa (40 horas) e marketing e plan de negocio da microempresa (40 horas).

https://www.depo.gal/web/edepo/-/noticia-%E2%80%9Cdepoemprende-ii%E2%80%9D-e-%E2%80%9Cdepoemprende-2017%E2%80%9D-chegan-esta-proxima-semana-a-seis-concellos-da-provincia

O campionato provincial de caza de raposo desafía ao mal tempo

O pavillón municipal de deportes de Barro acolle o xantar de confraternidade e a entrega de premios do XXV Campionato Provincial de Caza do Raposo.

O Partido Popular culpou ao alcalde de Vigo, Abel Caballero, do rexeitamento da Deputación de Pontevedra á comarcalización dos parques municipais de bombeiros.

Ante a porta de acceso ao Parque de Bombeiros de Pontevedra compareceu este martes o portavoz do grupo provincial do Partido Popular, Ángel Moldes xunto aos alcaldes populares da Lama e Campo Lameiro, a alcaldesa de Moraña e os portavoces municipais do PP nos concellos de Ponte Caldelas, Barro, Marín, Soutomaior e Poio.

Os populares sinalaron ao parque local pontevedrés como “o exemplo máis claro de que a comarcalización deste parque é o idóneo para dar cobertura a aqueles  concellos afectados” e que poderían dispoñer dun servizo de emerxencias en menor tempo.

Máis información preme no enlace :

http://pontevedraviva.com/xeral/42552/pp-culpa-abel-caballero-rechazo-deputacion-comarcalizacion-parques-bomberos/

A non inclusión no orzamento de Barro para 2018 dunha partida específica para a demolición da ponte sobre o Rego Areal, en San Antoniño, motivou a presentación de alegacións ás contas por parte dunha veciña do municipio.

Patricia Eirín Carreira solicita que se cumpra coa sentenza da Axencia de Protección da Legalidade Urbanística (APLU), á que que recorreu no seu momento e que en 2014 ditou unha sentenza que obriga á reposición dos terreos afectados ao seu estado orixinal ao entender que as obras non se adecuaban á legalidade urbanística vixente.

“O pasado mes de setembro a APLU dirixiu un escrito ao Concello de Barro no que se reitera”, asegura Erirín.

Por todo iso esta veciña solicita que se inclúa unha partida específica a este fin. Segundo unha valoración elaborada por unha “técnica competente”, asegura que as obras de demolición da ponte ascenderían a 155.668 euros.

Nas súas alegacións á sentenza da APLU, o Concello de Barro argumentou que a actuación denunciada estaba amparada por un expediente de modificación puntual do PXOM para adecuar a estrutura viaria da zona aos desenvolvementos residenciais. Ademais sinalou que no momento de incoar expediente urbanístico transcorrera o prazo máximo de seis anos establecido para ese efecto desde a finalización dos traballos.

http://pontevedraviva.com/xeral/42515/vecina-barro-presenta-alegacions-orzamento-cumpra-sentenza-urbanistica/

Presentación dos equipos do Barro C.F. e despois derbi por todo o alto diante dos veciños de Romai , líder da categoría.

Seis empresas que se dedicarán á fabricación de pezas de precisión, á compra-venda de vehículos, á distribución e aplicación de produtos para a construción, á fabricación de obleas de sabores, á comercialización de tecnoloxía sanitaria e á venda de repostos e accesorios para maquinaria pesada. Estes son os seis novos negocios que se van instalar no viveiro de empresas do Polígono de Barro despois de que a Presidenta da Deputación de Pontevedra, Carmela Silva, acompañada polo deputado provincial Carlos López Font, asinase os contratos de cesión de espazos para a súa instalación no Polígono. Con estas novas adxudicacións, sinalou Carmela Silva, “xa están ocupadas todas as 16 naves do viveiro e un total de 19 das 24 oficinas”. Isto, en porcentaxes, tradúcese no “100% das naves e o 79% das oficinas, isto é, o 90% do total dos espazos” dos que dispón o viveiro de empresas de Barro, informou a Presidenta provincial.

A empresa de Mª del Pilar Alonso Montes, que ocupará unha nave, dedicarase á “fabricación de obleas de distintos sabores que van ter distintos recursos relacionados do Camiño de Santiago, o que significa que o propio Camiño está a ser un movemento xerador de empresas de distintas empresas, o que me resulta especialmente prometedor”, sinalou Carmela Silva. Deste xeito, “o Camiño xa está a ser capaz de xerar moitas empresas e servizos, non só da propia hostalería ou restauración”, asegurou a Presidenta provincial.

A Presidenta tamén sinalou o proxecto de José Carlos Martínez Blanco (“Paumar Technology Consulting, S.L.“), dedicado á fabricación, deseño e comercialización de tecnoloxía (sistema sanitario e sistemas infantís) e que ocupará unha oficina. “Esta empresa é moi novidosa”, asegurou Carmela Silva, “está traballando con Telefónica, Microsoft, a fundación Pascual Maragall e coa asociación Reina Sofía para investigar sobre un procedemento que, de estar hoxe en funcionamento, tería permitido que 215 persoas que faleceron por mor de enfermidades ligadas ao Alzheimer non falecesen”. Este “proxecto tan relevante” presentarase en abril, avanzou Carmela Silva, “para dar resposta a enfermidades que cada vez sofren máis persoas”.

Ademais, a emprendedora María Ángeles Fernández Rodríguez instalarase cunha empresa de compra-venda de vehículos e ocupará unha nave. O empresario Javier Agrelo Bea, pola súa banda, cunha empresa dedicada á fabricación mediante mecanizado CNC de pezas de precisión (automoción, aeronáutica e máquinas especiais), ocupará dúas naves. Enrique Zamira Abuín, con “Sumibérica Productos Químicos para la construcción, S.L.“, dedicarase á distribución e aplicación de produtos para a construción, para o que ocupará dúas naves e dúas oficinas. Por último, Jorge Camilo Sabarís González de “Savid Repuestos, S.L.” instalará esta empresa dedicada á venda de repostos e accesorios para maquinaria pesada e camións de carga, ocupando unha nave e unha oficina.

https://www.depo.gal/web/edepo/-/noticia-carmela-silva-confirma-que-o-viveiro-de-empresas-de-barro-xa-ten-o-100-das-naves-adxudicadas

Baile de Reis, mañán domingo, na Nave da Música ás 19:00h. co dúo Marema.

En avanzado estado de desnutrición. Así atopou a Garda Civil a un cabalo en Barro. O seu dono, que o mantiña moribundo e en condicións precarias nun cortello, está a ser investigado por un delito de malos tratos animais.

O instituto armado, a través do Seprona, recibiu unha alerta a través do teléfono 062no a que se informaba das críticas circunstancias nas que se atopaba o equino.

O animal estaba nunhas deplorables condicións hixiénico-sanitarias nun galpón en ruínas contiguo á vivenda do seu propietario.

O cabalo estaba semienterrado no seu propio esterco e coas patas dianteiras aprisionadas entre o muro que facía de peche e un dos postes do enreixado da cuadra.

Coa axuda de varios veciños, os axentes lograron rescatar ao animal e procurarlle as primeiras atencións ata a chegada dunha veterinaria que, finalmente, decidiu sacrificalo para evitarlle o sufrimento que estaba a pasar

O propietario do cabalo, un mozo de 26 anos veciño de Barro, recibiu xa a notificación de investigado. Deberá comparecer no xulgado de instrución de garda de Pontevedra.

http://pontevedraviva.com/xeral/42485/sacrifican-caballo-dueno-tenia-desnutrido-moribundo-cuadra-barro/