O alcalde de Barro, Xosé Manuel Abraldes, está a xestionar a ampliación dos terreos do recinto do colexio Amor Ruibal. A ampliación do espacio escolar do CEIP é unha vella demanda da comunidade educativa, xa queos 2.200 metros cadrados que ocupa actualmente son “claramente insuficientes”para as necesidades dos nenos.

O planeamento urbanísitco en vigor non deixou previsto terreos para a ampliación, polo que o goberno municipal actual mantivo xa conversas cos propietarios dunha parcela anexa ao recinto(600 metros cuadrados), que “mostraron a súa total disposición a chegar un acordo”, segundo informou o rexedor.

Con este compromiso, o alcalde mantivo unha reunión co xefe territorial de Educación para informalo desta posibilidade e coñecer os trámites administrativos necesarios para ceder estes terreos á consellería, “para que a ampliación sexa unha realidade no vindeiro curso escolar”.

Nesta mesma entrevista, Xosé Manuel Fernández Abraldes fíxolle ver a necesidade de ampliar o comedor escolar, que está “ao límite das súas posibilidades”. De feito esta foi unha demanda da ANPA e a dirección do centro nunha reunión previa mantida co alcalde. Con esta ampliación poderíase aumentar o número de familias que usen o servizo de comedor.

Pola súa banda o xefe territorial da Consellería de Educación comprometeuse a que a unidade técnica visitará en breve o colexio para coñecer as pequenas obras precisas para acondicionar a ampliación do patio, así como as necesarias para a ampliación do comedor escolar.

http://pontevedraviva.com/xeral/21620/alcalde-barro-solicita-educacion-ampliacion-colegio-amor-ruibal/