Os 35 concellos da provincia de Pontevedra que gozan do servizo de padrón electrónico verán optimizadas as prestacións co novo contrato que vai licitar a Deputación

Servidores aínda máis rápidos e melloras na seguridade dos datos en cumprimento do Esquema Nacional de Seguridade son algúns dos cambios que van chegar co novo contrato para a prestación do padrón electrónico que a Deputación porá en marcha este febreiro próximo, catro anos despois da posta en marcha dun servizo que, xunto coa plataforma de Administración Electrónica brindada tamén pola Deputación, revolucionou o funcionamento interno dos pequenos e medianos concellos da provincia. O procedemento de licitación xa está en marcha.

O novo padrón electrónico foi presentado esta semana aos concellos adheridos polo deputado Carlos Font, e a deputada, Ana Mejías, nunha xuntanza celebrada en formato telemático e na que participaron tódolos municipios cos seus técnicos/as responsables, ademais de 14 alcaldes/as e tenentes de alcalde/sa que mostraron o seu interese para a adhesión: A Illa de Arousa, Catoira, Fornelos, Marín, Meis, Pazos de Borbén, Redondela, Ribadumia, Salceda, Salvaterra, Soutomaior, Cuntis, Mos e O Rosal. Entre eles tamén estaba o Concello de Barro, que se atopa formalizando os trámites para adherirse.

Carlos Font expresou a súa satisfacción polos logros acadados nos catro anos transcorridos dende a posta en marcha deste novo xeito de tramitar o padrón de habitantes, prescindindo dos expedientes en papel e apostando decididamente polo formato electrónico. Neste tempo emitíronse un total de 261.559 certificados en sede electrónica, mentres que outros 273.104 foron emitidos en formato presencial utilizando a tecnoloxía brindada pola Deputación. é dicir, que case o mesmo número de persoas obtiveron o seu certificado (documento habitual para numerosos trámites administrativos) sen necesidade de desprazarse.

O sistema tramitou nestes catro anos 42.367 altas e 36.596 baixas nos padróns dos concellos. Outras 39.150 persoas comunicaron modificacións dos seus datos persoais. Houbo 22.987 cambios de  domicilio e  23.597 rectificacións de domicilio. Finalmente, deuse curso a 4.339 renovacións de estranxeiros/as. Este importante volume de actividade foi posible porque o sistema xestiónase, ao igual que o servizo de Administración Electrónica, cun modelo na nube. Deste xeito evítase ademais que os concellos teñan que afrontar gastos informáticos tanto en hardware como en software, dado que o único requisito é dispoñer dun ordenador con acceso á Internet. Outra vantaxe é a rapidez na implantación da solución, dado que non é necesaria instalación inicial nos equipos e, finalmente, a actualización aos cambios normativos é automática.

A Deputación asume o 75% do custo

Unha vez adxudicado o novo contrato á empresa tecnolóxica que resulte gañadora do procedemento, a Deputación soportará o 75% do custo, polo que os concellos que asinen o convenio deberán achegar o 25% restante. Así o baremo das achegas municipais oscilará, en función da poboación dos concellos, entre os 500 euros anuais para os municipios de menos de 5.000 habitantes e os 3.000 euros que corresponden aos que están entre os 30.001 e os 50.000.

Font concluíu a xuntanza celebrada cos concellos asegurando que a Deputación aposta por manter un servizo que deu uns resultados óptimos e por iso continúa coa decisión de costear o 75% do custo do novo contrato “dentro do noso modelo de garantir os servizos en todo o territorio con proxectos globais e repartidos con criterios obxectivos”. “O diñeiro público”, rematou, “utilízase para asegurar os mesmos dereitos ao conxunto da cidadanía, viva onde viva e goberne quen goberne”.

Ata o de agora o padrón electrónico proporcionado pola Deputación está implantado nos concellos da Cañiza, A Estrada, Agolada, A Guarda, A Lama, As Neves, Arbo, Baiona, Bueu, Campo Lameiro, Cangas, Covelo, Crecente, Cuntis, Forcarei, Gondomar, Lalín, Mondariz, Mondariz-Balneario, Meaño, Moaña, Moraña, Oia, O Grove, O Rosal, Ponte Caldelas, Ponteareas, Portas, Sanxenxo, Silleda, Tomiño, Tui, Vila de Cruces, Valga e Vilaboa.

Deixar unha resposta

introduce os teu datos ou preme nunha das iconas:

Logotipo de WordPress.com

Estás a comentar desde a túa conta de WordPress.com. Sair /  Cambiar )

Google photo

Estás a comentar desde a túa conta de Google. Sair /  Cambiar )

Twitter picture

Estás a comentar desde a túa conta de Twitter. Sair /  Cambiar )

Facebook photo

Estás a comentar desde a túa conta de Facebook. Sair /  Cambiar )

Conectando a %s