A Xunta publicou a lista provisional de admitidos das súas escolas infantís, e a listaxe de nenos que non lograron praza. Son case seis mil -5.992- aínda que desde a Consellería de Traballo e Benestar insisten en que moitas das solicitudes están duplicadas; que noutros casos reservaron praza tamén nun centro municipal; e finalmente que é necesario restar o milleiro de pequenos aos que se lles dá o cheque infantil, polo que poden acudir a unha gardería privada, pagando o mesmo que abonarían na pública.
Aínda así, son miles os pequenos que por un motivo ou outro non terán praza nun centro Galiña Azul. E a inmensa maioría ao redor das cidades de Vigo e A Coruña (1.379 e 906 peticións, respectivamente), aínda que en Pontevedra tamén se supera o medio milleiro de solicitudes sen praza. Nesta ocasión a capital galega, que sempre presentaba unha enorme demanda, rexistra unha lista de espera menor, de 385 peticións en catro escolas infantís.
O día 27 coñecerase a listaxe definitiva de admitidos e a matrícula estenderase do 28 de maio ao 10 de xuño. O curso comezará o 4 de setembro. A demanda das garderías públicas é moi variable non só entre concellos senón que no mesmo municipio hai diferenzas considerables. Por exemplo, en Santiago hai escolas con 75 nenos en lista de espera mentres outras teñen o dobre. Algo parecido ocorre en Vigo, onde hai garderías públicas con 66 ou 145 solicitudes agardando, fronte a outras da mesma cidade que superan as 300.
Pero tamén se dá a situación contraria. Concellos con lista de espera cero (como Zas, Camariñas, Ribadavia, Bande, Pantón, Mondoñedo, Barro, Silleda ou Crecente), ou con nenos que non entraron porque pertencen a municipios limítrofes ou que incluso nin sequera limitan co concello no que está a gardería. Tamén hai garderías con poucos nenos. Moi poucos. Na de Cartelle, provisionalmente, hai un total de cinco. En Antas de Ulla sete, e na escola de Sobrado dos Monxes seis, dúas por ano. Desde o Consorcio Galego de Benestar aseguran que nas escolas nas que os pais saben que haberá praza poida que a matrícula suba despois, xa que os proxenitores non se apresuran a facer a reserva ao saber que existe oferta suficiente. Ademais, a Xunta non ten un número mínimo de pequenos para manter aberta unha escola infantil, senón que se estudan os casos un a un.
Por exemplo, a gardería da Bola pechouse un ano por escaseza de alumnos, e a de Muíños será a única que de momento xa se sabe que non abrirá o próximo curso. Non o fixo este, e só dúas familias interesáronse por unha praza de cara ao 2014-2015, pero en previsión de que non abrise tamén solicitaron praza en Bande. Ademais do número de nenos que haxa, a Xunta ten en conta que exista outra escola pública relativamente cerca e que esta teña vacantes.
Este ano, e xa van dous consecutivos, a Xunta decidiu elevar a puntuación que se concede ao feito de que os pais traballen. Desde a Administración insístese en que as escolas infantís son fundamentalmente unha ferramenta de conciliación, e de aí o feito de baremar o que os proxenitores estean ocupados.
Por provincias, en Ourense só hai sete municipios cuxas garderías teñen lista de espera, e nalgún caso testemuñal (un ou dous nenos); en Lugo hai oito concellos con pequenos que non entraron nunha escola infantil; mentres que na Coruña a cifra elévase a 26 concellos; e en Pontevedra a 27. Ferrol é das sete principais cidades a que ten un menor problema de falta de prazas en garderías da Xunta.
NOTICIAS DE BARRO 