Os «apaixonados seguidores» da arte de Manuel Ruibal en Madrid están de parabén, como destaca o seu alcalde, Alberto Ruiz-Gallardón, no catálogo que ilustra a próxima exposición do artista pontevedrés na capital. Ao Teatro Fernán Gómez (antes coñecido como o Centro Cultural da Villa ), levará o creador a partir de mañá nada menos que 208 obras que ejemplifican 46 anos de traxectoria. é, como di o propio creador, a exposición máis ambiciosa que realizou ata a data e duplica en pezas a que o pasado ano realizou no Museo de Pontevedra. Pura Pintura (1963-2009) é o título desta retrospectiva, coa que Ruibal volve a Madrid logo de 25 anos. Naquela ocasión mostrou o seu traballo en ARCO, e antes, en 1979, tamén cultivara un notable éxito coa mostra na Galería Rayuela, e co libro que publicara sobre a súa vida e obra José de Castro Arines. Coa nova exhibición, como recalca Gallardón, «podemos coñecer a súa evolución e as distintas fases que marcan a súa obra ata chegar a unha pintura colmada de pureza». «A exposición -engade- recupera case 50 anos de traballo, nos que se manifesta unha longa e continua depuración na súa obra: esquemas, trazos e liñas capaces de describir un mundo de elegancia e naturalidade, de sutís referencias e poesía plástica». O alcalde recorda que a mostra do Museo é a base desta nova proposta, aínda que o traballo que a enriquece «achega unha visión máis complexa e completa do artista». Outro dos seus incondicionais e amigo, Francisco Javier Moldes, fai unha emotiva descrición do artista no mesmo catálogo. Por encima de todo considéralle un inconformista.

Ruibal subliña que esta mostra empezou a xestarse nada máis finalizar a do Museo. Das 208 obras que a compoñen, só 73 son propiedade do artista, que recoñece que localizalas e conseguir a cesión de moitas delas en Madrid, Valladolid, Murcia ou Bilbao foi un arduo traballo. «Nesta exposición vai o mejorcito do que fixen na miña carreira», di. «Fíxache, son case cincuenta anos -engade Ruibal-. Faime moita ilusión e vale a pena ver toda esta obra xunta. Algunha non a vexo desde fai 40 anos. En Madrid localicei algunha pintura de 1963 e en cambio, a exposición de Pontevedra empezaba no 66. Creo ademais que a exposición está moi ben traballada, do mesmo xeito que o catálogo que se editou». En cifras, a mostra representa un 10% de todo o seu traballo nestes anos, nos que calcula que realizaría dous mil obras. Ademais das súas pinturas, exhibiranse debuxos e bosquexos de esculturas, e no local figurarán aforismos e o poema que Ruibal dedicou á súa nai, Preciosa, que tamén se viu en Pontevedra. «Aquí quixen dedicarlle a ela a exposición, era un desexo meu desde que era neno, pero en Madrid non tiña sentido; en Pontevedra coñecíaa moita xente, pero alí non», explica o creador. A mostra tamén lle evoca o momento en que chegou á capital nos 60 para converterse en «un gran artista» e triunfar. A recado que o conseguiu.