Barro, 2 de febreiro de 2010. O pasado domingo, día 31 de xaneiro,

foron inauguradas as obras de reforma da estrada entre A Goulla e

Porráns, polo Presidente da Deputación e polo conselleiro de Medio

Ambiente, Territorio e Infraestruturas.

O BNG considera que esta era unha obra necesaria para a mellora

da seguridade de todo o seu trazado. O que nos parece esaxerado

é que unha obra destas características implique 8 anos de molestias

e inseguridade, debido ao mal costume da Deputación de

fraccionar as súas actuacións en innumerábeis fases.

Para o BNG non é de recibo que despois de agardar tantos anos,

a inauguración destas obras se faga sen resolver algúns problemas

de construción detectados na mesma. Un deses problemas é

a rotonda de Valiñas (na que se fixo a inauguración oficial) que presenta

problemas de xiro tanto para camións como para autobuses,

deficiencias recoñecidas mesmo polo Alcalde de Barro en sesión

plenaria, e que aínda non foron subsanados.

Outra das carencias detectadas é a non reposición da marquesiña

que existía no entorno do cruce de Valiñas, e que permitía aos

usuarios do transporte escolar resgardarse das inclemencias do

tempo.

O BNG demanda que se solventen todas estas deficiencias á

maior brevidade posíbel, aínda que xa se teña feito a inauguración

oficial.