É unha prioridade para nós un novo centro de saúde

la voz

No ecuador do seu mandato, o alcalde de Barro, o nacionalista Xosé Manuel Fernández Abraldes, fixo onte balance destes dous anos para remarcar que «é unha prioridade para nós un novo centro de saúde». Remarcou que o actual «non cumpre un mínimo estándar» a todos os niveis.

Neste punto, sinalou que está disposto a dar «unha marxe de confianza» ao novo xerente da Estrutura Organizativa de Xestión Integrada (EOXI) de Pontevedra e O Salnés, José Ramón Gómez. Neste sentido, destacou que este último está «preparando un plan de actuacións na súa área» no que se contemplan distintas actuacións por orden de prioridade e, entre elas, atoparíase o novo centro de saúde.

Á hora de botar a vista atrás, Abraldes fai unha valoración positiva destes dous anos. A súa filosofía: «Optamos por non facer grandes obras e centrarmos nos problemas pequenos da xente». Mentres que o obxectivo último, que «a xente estea contenta e orgullosa de vivir en Barro».

O polígono e as infraestruturas son outras das súas grandes apostas. Mentres que o parque empresarial de Barro-Meis «está indo ben», a seguridade da PO-531 e da N-550, así como a construción da A-57 son os seus quebradeiros de cabeza. De feito, onte tiña previsto manter unha reunión cos veciños de Curro para analizar este último proxecto.

De igual modo, amosou a súa preocupación pola seguridade dos peregrinos que diariamente atravesan o seu concello.

http://www.lavozdegalicia.es/noticia/pontevedra/barro/2017/07/19/span-langgle-unha-prioridade-nos-novo-centro-saudespan/0003_201707P19C4992.htm

abraldes

O BNG DENUNCIA QUE PP E PSOE APROBAN UN CATASTRAZO EN BARRO

Barro, 29 de maio de 2012. Co único fin de cargar sobre as economías familiares a mala situación económica do Concello, oPP, coa colaboración do PSOE, veñen de aprobar unha revisión do catastro que vai a supor unha suba brutal da contribución para os veciños e veciñas de Barro.

Unha suba que significa triplicar a recadación por este imposto. A revisión non supón un incremento significativo no número de vivendas e, polo tanto, este incremento na recadación vén dado por unha suba abusiva nos recibos, o que é unha verdadeira extorsión ás familias de Barro.

Esta suba vaise sumar ademais á aprobada polo goberno central do PP, que para os recibos do 2012 supón un incremento do 10%.

Unha suba que non se vai producir só para o ano 2013, senón tamén para os vindeiros seis anos até chegar ao máximo do incremento.

O desmedido afán recadatorio do goberno municipal, co apoio do PSOE, queda de manifesto nas construcións existentes en solo rústico. Neste caso a recomendación da xerencia do catastro era aplicar o mínimo coeficiente de pago (0,50), pero o acordo adoptado polo PP e PSOE foi de cobrar o máximo permitido (1), é dicir o dobre do proposto pola xerencia do catastro.

O atraco que isto supón para os veciños é brutal, pois a previsión é de incrementar máis de 300.000 a recadación. Cartos que van saír do peto da xente.Vai haber casos nos que vivendas pequenas que pagan uns 50 euros/ano van pasar a pagar uns 300.

O BNG considera que non se pode facer recaer nas economías familiares a mala xestión económica das Administracións, pois as familias xa están sufrindo día a día os efectos da crise económica que estamos a padecer.

En plena campaña electoral para a reelección, o alcalde prometeu por carta a todos os veciños e veciñas que non os “ía fritir a impostos”. Levamos un ano e, dende aquela, xa tivemos fai seis meses a primeira suba do lixo e do imposto de circulación, ao que se lle engade agora a suba da contribución, que o único que busca é tapar a incapacidade para gobernar do PP.

Despois de 29 anos gobernando o Concello, o PP foi incapaz de aproveitar os momentos de bonanza económica para dotar a Barro dos servizos básicos, e agora carga nos petos dos veciños a súa ineficacia.

Un alcalde que mentíu aos veciños e veciñas para gañar unhas eleccións, e que se ve sobrepasado pola situación que estamos a vivir. está inhabilitado para seguir gobernando o noso concello.

Asdo: Xosé Manuel Fernández Abraldes

https://noticiasbarro.wordpress.com/2011/05/12/promesas-de-landin-para-os-proximos-4-anos/