A Consellería de Medio Ambiente expón xa ao público o estudo de impacto ambiental
A Consellería de Medio Ambiente, Territorio e Infraestruturas dá un novo impulso ao proxecto de concentración parcelaria Perdecanai-Barro II coa posta a exposición pública da avaliación de impacto ambiental do mesmo.
No devandito documento establécese que o obxecto desta actuación é levar a cabo o proceso de concentración parcelaria nas parroquias de San Breixo de Barro e Santa María de Perdecanai no concello de Barro. Sinala que o proceso de concentración parcelaria consta de tres partes ben diferenciadas que consiste no plan de concentración, o plan de obras e o plan de acondicionamento das leiras no que o maior risco de operacións de maquinaria e por tanto de deterioración dos elementos ambientais é a fase de obras e o acondicionamento de leiras.
Sinala que as dúas parroquias supoñen un 39,5% da superficie total do Concello de Barro e o perímetro da zona a concentrar abarca unha superficie aproximada de 518 hectáreas. Os camiños proxectados a nivel de anteproxecto representan unha lonxitude de 18.642 metros entre os viarios de nova apertura e o acondicionamento daqueles xa existentes na actualidade.
O documento tamén recolle a existencia de numerosas canles e cursos de auga, co río Barosa ou Agra como unha das principais concas, xunto coas de Rego Lourido, Rego de Santa Susana e Rego de Abaixo. Ademais sinalan que a maior parte da superficie (pola súa pendente atenuada) é facilmente cultivable e aproveitable para a agricultura.
NOTICIAS DE BARRO 