O concello de Barro dispón xa dun novo goberno encabezado polo nacionalista Xosé Manuel Fernández Abraldes e o socialista José Sanmartín, que asinaron onte un pacto de colaboración no que cada un dos seis concelleiros será responsable dunha carteira de goberno e no que hai cabida para a participación da cidadanía.
Este último punto é o primeiro gran proxecto que porá en marcha o novo executivo, pois nos próximos días iniciará unha rolda de contactos e reunións con todas as asociacións culturais e veciñais para recoller suxestións e atender as súas necesidades. Outra tarefa que teñen sobre a mesa é a elaboración xa dun novo orzamento para o próximo ano, posto que os fondos do actual están case esgotados e non hai diñeiro para afrontar unha eventual avaría ou imprevisto.
No referente á división das áreas de goberno, os dous edís do PSOE serán titulares de senllas carteiras. José Sanmartín, que é tamén primeiro tenente de alcalde, ocuparase da concellaría de obras e servizos; mentres que Lea Rodríguez será responsable de promoción económica, emprego e turismo. Por parte do Bloque, Roberto Rivas será o concelleiro de cultura, festas, patrimonio e medio rural; María Cancela ocúpase do benestar social, educación e sanidade; e Antonio Giráldez, de deportes. O resto de áreas serán competencia do alcalde.
Outro alicerce básico do novo goberno é a transparencia, por iso decidiron facer públicas as retribucións de cada un dos membros da corporación. Só haberá soldo para o alcalde, que percibirá 30.000 euros brutos ao ano, uns 1.600 euros ao mes. Mentres que os concelleiros que acudan aos plenos cobrarán 100 euros, por comisión de goberno, 50 euros; e por comisión informativa, 30 euros.
O mercadillo dos domingos é un das frontes abertas que ten o novo goberno. Tanto BNG como PSOE coinciden na súa vontade de recuperar a xestión pública do mesmo e anuncian que «levarán a cabo todas as medidas que sexan necesarias», segundo recolle o acordo.
Sobre o pacto, Abraldes quixo destacar que «as responsabilidades serán compartidas, pero cada concelleiro administrará a súa propia área» e engade que «buscamos a colaboración e implicación de todo o mundo, traballaremos arreo para dinamizar a vida do concello», recalca. Mentres que Sanmartín destacou a importancia do cambio de goberno.
NOTICIAS DE BARRO 