O BNG e o PSOE escenificaron onte o pacto de goberno co que pretenden establecer unha nova relación entre os veciños co Concello. En palabras do alcalde, Xosé Manuel Fernández Abraldes, os dous partidos teñen como prioridade “fomentar a participación cidadá”. Conscientes do alto nivel de débeda do Concello, indicou tamén que será un mandato no que se “se saque proveito de todo euro que se poida investir” e entre os puntos quentes que asinaron ambos os partidos está o obxectivo de que o mercadillo dos domingos sexa de xestión pública.
As áreas de goberno que se aprobarán no pleno de mañá ás 21 horas repartiranse entre o seis membros do BNG e PSOE. Dos socialistas, José Sanmartín ostentará a primeira tenencia de alcalde e as áreas de Obras e Servizos, mentres que Lea Rodríguez encargarase de Promoción Económica, Emprego e Turismo. No BNG, Roberto Rivas será o segundo tenente alcalde e farase cargo de Cultura, Festas, Patrimonio e Medio Rural; Amelia Cancela, levará Benestar Social, Educación e Sanidade, mentres que Antonio Giráldez farase cargo de Deportes. O rexedor, Abraldes (BNG), será o responsable do resto de áreas de goberno, entre as que están Urbanismo, Persoal e Facenda.
“Desde a noite electoral tiñamos claro que era obrigatorio un goberno alternativo despois de 32 anos con Landín”, indicaba o rexedor que agradecía o apoio do PSOE no acto de investidura de alcalde, a pesar de que entón non había ningún acordo previo. “Desde o primeiro momento coincidiamos en que os dous programas políticos parecían cociñados xuntos, as dúas forzas de esquerdas de Barro falamos o mesmo idioma”, sinala Sanmartín.
Dentro dos cambios existentes, o novo goberno incorporará comisións específicas coas áreas do PSOE e outra con parte do BNG, mantendo as xerais, que pasarán facerse, como mínimo, dous días antes dos plenos, que se manteñen cada dous meses. O pacto acorda a dedicación exclusiva do alcalde, que será 30.000 euros brutos ao ano, mentres que os concelleiros recibirán por asistir aos plenos 100 euros, 50 por comisión de goberno e 30 por comisión informativa.
Abraldes destacou o “inexistente” traspaso de poderes. “O único que nos dixo Landín, foi na noite do 24 de maio, que tiñamos que facer a festa do viño”, indicaba o alcalde, que destacaba que do orzamento “quedou o xusto, esperemos que non ocorra ningún gasto inesperado”. Nas prioridades do goberno está impulsar as comisións parroquiais, recentemente creadas e que esperan estar activas. Outros puntos será revisar o campo de fútbol, a xestión pública do mercadillo ou o proxecto da rotonda na PO-550.
NOTICIAS DE BARRO 