A reunión centrouse en analizar problemas a solucionar e na repartición de parcelas entre os integrantes de cada unha das listas
Os contactos entre BNG e PSOE de Barro seguen producíndose para alcanzar un acordo que releve da alcaldía ao popular José Antonio Landín. Na noite de onte, nacionalistas e socialistas tiveron a súa segunda xornada de negociacións, nas que empezaron a estruturar o futuro goberno municipal.
Neste segundo encontro, as negociacións deron un gran paso cara a adiante, aínda que non definitivo para a formación dun goberno en coalición. A reunión centrouse en analizar problemas a solucionar e na repartición de parcelas entre os integrantes de cada unha das listas.
Nos próximos días, volverán celebrar outra reunión na que esperan pechar a composición do novo executivo e culminar a repartición de áreas de goberno.
O pasado venres tivo lugar o primeiro encontro entre ambas as comisións de negociación (compostas polos tres primeiros integrantes de cada lista) na que puxeron en común os programas dunha e outra candidatura e comprobaron que coinciden ao 90 %, co que «non haberá problemas para pórse de acordo», augura Abraldes.
No que si lograron xa un pacto ambos os líderes, Abraldes e Sanmartín, é na organización da Feira do Viño de Barro que terá lugar o fin de semana do 19 ao 21 de xuño. Ambos os partidos traballan xa na organización do evento para confeccionar un programa que satisfaga a todos os veciños e turistas.
NOTICIAS DE BARRO 