O Servizo de Intermediación Laboral de Cogami axudou a inserirse laboralmente durante o 2014 a un total de 69 veciños da bisbarra de Pontevedra con algún tipo de minusvalidez. O exercicio que acaba de rematar pechouse cun número de contratos superior ao do ano anterior, 117, aínda que «son de peor calidade porque son de menor duración e cunha xornada reducida», segundo a coordinadora do servizo, Mari Carmen Ínsua.

Do total de usuarios, 47 son residentes na cidade do Lérez, mentres que outros sete o fan en ponte Caldelas e o mesmo número en Poio. Vilaboa acolle outros tres beneficiarios deste servizo gratuíto, así como Cotobade dous, e Barro, A Lama e Campo Lameiro, un cada un.

Durante o ano pasado incorporáronse a este rexistro un total de 218 persoas, o que engrosa a cifra total de usuarios na bisbarra a 3.978, e as do municipio pontevedrés a 1.041.