O BNG presentará unha serie de emendas para que os Orzamentos do Estado e de Galicia contemplen o arranxo dos problemas de seguridade viaria no municipio de Barro. O responsable local do BNG, Xosé Manuel Fernández Abraldes, explica que o municipio de Barro “ten a triste honra de saír permanentemente nos medios de comunicación polos accidentes de tráfico que se producen nas súas estradas e isto non é casual, como tampouco inevitable”.
Segundo Abraldes, estes accidentes teñen moito que ver co “deixamento” das administracións competentes, Concello, Deputación de Pontevedra, Consellería de Infraestruturas ou Ministerio de Fomento. “Todas elas con competencias nos viarios máis conflitos e perigosos”, engade.
Os nacionalistas explican que levan moito tempo denunciando a “parálise absoluta das administracións”, mentres os accidentes acumúlanse “nunha triste estatística de feridos e mortos”.
Ante esta “parálise”, o BNG acaba de iniciar unha ofensiva institucional, tanto no Concello, como no Parlamento galego e no Congreso, para liquidar estes problemas de seguridade viaria detectados na N-550 (cruzamento do Lombo dá Maceira coa PO-224, cruzamento coa estrada provincial Portela-Curro, cruzamento coa rúa Areal e cruzamento de Porráns, na ligazón coa estrada PO-226) e na PO-531.
Alegacións
Así mesmo, o BNG vai presentar alegacións tanto aos orzamentos do Estado como aos de Galicia para que se inclúan estas demandas nas contas anuais.
Nunha iniciativa presentada ao Congreso dos Deputados o BNG pregunta que disposición ten o Ministerio de Fomento para mellorar a seguridade nas cruces da N-550, se son conscientes dos problemas de seguridade viaria nos viarios da comarca, ou se o ministerio “vai tomarse en serio a necesidade de arranxar estes problemas”.
NOTICIAS DE BARRO 