O Concello de Pontevedra activou xa o dispositivo de seguridade e tráfico necesario para acoller o fin de semana que vén o Campionato do Mundo de Dúatlon, unha proba de primeiro nivel internacional que atraerá a atención de miles de afeccionados. Por iso, o goberno local preparou unha serie de medidas chamadas a contribuír ao éxito da competición.
Mañá, por exemplo, arrincará a instalación de 600 valos ao longo do percorrido e 73 paneis informativos que sinalizarán as entradas e saídas da cidade. Paralelamente, a semana pasada policías locais visitaron todos os establecementos públicos (bares, restaurantes, comercios…) situados no tramo da N-550 afectados pola proba para informarlles do evento, unha tarefa que continuará hoxe pero xa nos locais da cidade. O Concello deu orde ademais de activar unha mobilización de limpeza nas rúas de Pontevedra co obxectivo de que a imaxe da cidade luza inmellorable durante o fin de semana.
Cortes de tráfico
En canto aos cortes de tráfico, no que respecta ao circuíto a pé, as rúas afectadas serán as seguintes: Pai Fernando Olmedo, Pai Gaite, Perfecto Feijoo, Barcelos, Rouco, Cobián Roffignac, Benito Corbal, a praza da Peregrina e Pórtaa de Trabancas, os soportais da Ferrería, a praza de Curros Enríquez, Rela, Sarmiento, Pai Amoedo, Buenos Aires e Xosé Malvar. No caso do circuíto en bicicleta, as vías nos que se rexistrarán cortes serán a avenida de Buenos Aires, a ponte dos Tirantes, Enxeñeiro Rafael Areses, avenida de Compostela e a ponte de Santiago. As interrupcións do tráfico prolongaranse entre as oito da mañá e as 20,30 horas.
En canto aos aparcadoiros, o Concello prohibirá o estacionamento nalgunhas rúas a partir do xoves, aínda que previamente se colocarán un valado específico para advertir aos condutores da situación.
Para rematar, a estrada N-550 só estará pechada no tramo entre Pontevedra e Barro o domingo entre as 7,30 horas da mañá e as catro da tarde.
NOTICIAS DE BARRO 