A Garda Civil detivo nas últimas horas ao suposto autor dunha oleada de roubos na comarca do Umia e que afectaba, especialmente, a establecementos comerciais. As localidades máis afectadas eran as de Caldas de Reis e Cuntis nas que actuaba de forma preferente o agora detido.
A detención produciuse nas propias instalacións da Garda Civil, ao parecer, tras ser citada esta persoa (que responde ás iniciais D. C. P) pola súa relación con estes feitos.
Este home estaría detrás de polo menos cinco roubos cometidos nos últimos tempos na zona de Caldas de Reis. Por exemplo, o que sufriu unha empresa de paquetería situada en Godos, de onde se levou varios paquetes así como ferramentas de todo tipo e certa cantidade de diñeiro en efectivo. Un local ao que accedeu tras forzar a porta de entrada rompendo a cerradura.
Outro dos seus “golpes” sería o que sufriu de madrugada un estanco situado no lugar de Carracedo, en Caldas, o pasado día 20 de marzo. Xa no mes de abril atribúenselle outros tres roubos. Os dous primeiros o día 2 cando supuestamente subtraeu diversos efectos dun negocio de Cuntis que se dedica aos seguros e aos servizos funerarios e dun gimnasio situado no lugar do Perdecanai, en Barro.
O último dos roubos cometeuse o día 3 deste mes nunha clínica dental da localidade de Cuntis.
En total, a Garda Civil atribúelle a esta persoa un total de cinco roubos con forza na cousas polos que terá que responder ante o xulgado de Caldas de Reis.
NOTICIAS DE BARRO 