O descarrilamento dunha vagoneta de mantemento de Renfe nas proximidades do apeadeiro da Portela (Barro) a pasada madrugada interrompeu durante case dez horas o tráfico ferroviario da liña ACoruña-Vigo.
O sinistro rexistrouse sobre as cinco da madrugada e afectou especialmente aos dous primeiros trens, o procedente de Vigo, das 5,15 da mañá e o da Coruña, das 5,35. Estes dous convois chegaron a destino cun atraso de 68 e 40 minutos respectivamente.
Os demais trens previstos para a mañá de onte tiveron atrasos media de 15 minutos, debido a que ata case a unha da tarde estivo cortada unha das vías, polo que foi necesario regular o tráfico de convois en ambas as dúas direccións.
En fontes de Renfe sinalan que se tratou dun simple incidente na vía, pois os únicos danos os sufriu o pequeno vagón que circulaba con material de mantemento.
Aseguran así mesmo que non houbo danos estruturais na vía e tampouco persoais, xa que o operario maquinista resultou ileso.
O accidente aconteceu a uns oito quilómetros da estación deVilagarcía, no lugar de Faxil, xusto no punto onde finaliza o tramo de dobre vía e comeza o segmento antigo ata Pontevedra.
O tráfico ferroviario restableceuse á unha da tarde de onte, pois antes se fixo imprescindible a retirada da vagoneta accidentada e a comprobación do estado das vías, para evitar problemas ao resto de viaxes pola liña da Coruña a Vigo.
Renfe resta importancia ao accidente, aínda que non determina os motivos que puideron provocar o descarrilamento e posterior xiro.
Trátase dun vehículo de pequeno tamaño que só circula en horario nocturno cando apenas existe tráfico ferroviario, salvo os de longa distancia, cuxa cadencia está perfectamente determinada.
A función destes operarios é a de revisar o estado da vía e de retirar calquera obxecto que poida interromper a circulación, así como outras tarefas ordinarias.
En definitiva son trens de traballo que adoitan transportar material axeitado para corrixir calquera problema que se encontre ao longo do traxecto de recoñecemento. A vagoneta sinistrada foi levada ao taller de Redondela.
NOTICIAS DE BARRO 