Tres mozos víronse implicados nun aparatoso accidente de tráfico que se rexistrou pouco despois das 23 horas do venres na estrada de Romai (Portas) a Paradela, no termo municipal de Meis. Ían nun Audi A3 que por razóns que se descoñecen se saíu da estrada, chocando violentamente contra un muro de pedra.

Polo menos un dos mozos era de Barro, e foron trasladados en ambulancia, aínda que nun principio as súas lesións non parecían graves. O accidente motivou que se reunisen na zona un gran número de persoas, entre familiares dos accidentados e veciños. Tanto é así que un condutor que pasou pola estrada de Vilagarcía a Pontevedra e viu o grupo no vial secundario chamou ao servizo de emerxencias do 112 para alertar do sinistro.

A saída de vía produciuse nunha zona de estrada moi sinuosa, e unha das hipóteses que se barallan é que o vehículo circulase a unha velocidade inapropiada para ese tramo de vía. De todos os xeitos, un dos mozos que ían no coche manifestou así mesmo que o condutor tivo que dar un volantazo porque se lles cruzou algo na estrada xusto ao saír dunha curva, e que foi esa a razón pola que impactaron contra o muro.

Esta mesma semana produciuse outro accidente de tráfico con mozos implicados. Foi en Vilanova, tamén nunha estrada con numerosas curvas. Nese caso parece ser que o condutor ía demasiado rápido, envorcando á saída dunha curva. Pero a pesar da aparatosidade do sinistro, os dous ocupantes do turismo saíron polo seu propio pé con apenas rabuñaduras.

http://www.farodevigo.es/portada-arousa/2014/03/16/tres-jovenes-resultan-heridos-chocar/986130.html