A pé, pero tamén en carritos de bebés ou ata encadeira de rodas, centos de pontevedreses de todas as idades
percorreron onte as rúas para clamar contra a impunidade, un “xuízo farsa” e esixir xustiza once anos despois do desastre do Prestige. Convocados pola plataforma Nunca Máis, ao redor de 2.000 veciños da comarca participaron na movilización para deixar claro o seu “Nunca Máis” á incompetencia política “ás mareas negras de chapapote, de manipulación e de mentiras”.
Numerosos políticos, caso dos alcaldes de Pontevedra e Poio, os nacionalistas Miguel Fernández Lores e Luciano Sobral ou o novo secretario local do PSOE, Agustín Fernández, así como a parlamentaria socialista Patricia Vilán, sumáronse á marcha, que tamén contou coa presenza de representantes da cultura como o artista Manuel Moldes, o escritor Manuel Lourenzo ou o fundador do Aula Castelao, Ramón Regueira, que foi o encargado de ler o manifesto de Nunca Máis.
A plataforma sinala que “afortunadamente hoxe non temos unha marea de chapapote pero si outra marea de impunidade tras un xuízo farsa que di que ninguén tivo a culpa, e outra marea de manipulación, que usa esa sentenza para lavar a cara aos responsables, que fixeron todo ben e foi Nunca Máis que axitou á xente”, sinalou o portavoz da plataforma, Xosé Abraldes, cando a manifestación chegou a praza de España.
Previamente, os centos de participantes percorreron distintas rúas do centro tras unha pancarta na que podía lerse “Impunidade Nunca Máis” nunha marcha que tamén serviu para recaudar fondos parao recurso de casación que Nunca Máis presentará ante o Tribunal Supremo mediante a venda de merchandising.
O himno do antigo reino de Galicia, interpretado polo grupo tradicional Vos Chichisos, saudou aos participantes na manifestación á súa chegada a praza de España. A profesora e historiadora Susana Trigo tomou a palabra para contar historias dos voluntarios que desde distintos puntos da Península percorreron quilómetros nunha xigantesca marea solidaria antes de ironizar con que seguramente o desastre do Prestige nin se produciu: “Que catástrofe nin nada, foi unha magnífica intervención artística”.
Recordou que eses días foron tamén un exemplo de como os cidadáns podemos autogestionarnos, tomar decisións asemblearias, ser libres e autodeterminados, “a utopía do autogobierno feito realidade”, recordou.
Momentos despois tomou a palabra Ramón Regueira para ler o manifesto que tamén se escoitou noutras moitas localidades galegas, onde se piden medios para afrontar outro accidente marítimo, a xestión definitiva para o fuel do pecio Prestige, o seguimiento da saúde das persoas que limparon o chapapote, as competencias propias en seguridade e salvamento marítimo, o retorno da seguridade marítima á xestión pública… E medidas legislativas que acaben coa impunidade dos que contaminan.
NOTICIAS DE BARRO 