A Enquisa de Poboación Activa (EPA) do segundo trimestre de 2013 publicada onte polo Instituto Nacional de Estatística  (INE) sitúa a taxa de paro no municipio de Pontevedra no 21%, o que supón dous puntos máis sobre os datos do trimestre anterior. Este aumento contrasta cos datos do desemprego rexistrado, que ofrece un descenso paulatino desde fai uns meses.

En todo caso, pese a ese aumento do 19 ao 21%, Pontevedra mantense como unha das cidades galegas cunha taxa máis baixa, só por detrás do 16,5 da Coruña. Ferrol encabeza o listado (33,3%), por diante de Vigo (26,1), Santiago (24,6), Ourense (23,3) e Lugo (21,3%).

A EPA tamén detalla que dos 25.600 contratos no municipio, 20.700 son de duración indefinida (400 menos que no trimestre anterior) e cinco mil son temporais, por encima dos 4.800 do primeiro trimestre. Así mesmo, a inmensa maioría dos empregos corresponden ao sector servizos.

O pasado mes de xuño, último periodo con datos oficiais, acabou cunha forte caída do paro na cidade de Pontevedra así como en toda a súa área de influencia. O municipio pontevedrés pechou o mes cun total de 8.745 parados, o que permite baixar da barreira dos 9.000 desempleados na que se mantiña desde fai meses. A caída nas cifras do paro é xeneralizada en todos os concellos da comarca (Poio, Sanxenxo, Marín, Vilaboa, Ponte Caldelas, A Lama, Cotobade, Campo Lameiro, Moraña, Cuntis, Caldas, Portas e Barro, ademais da capital) que suman en total 20.408 desempleados, 1.018 menos que á pechadura do mes de maio.

A maior caída en términos absolutos é a de Pontevedra con estes 362 parados menos. Séguelle, como é de esperar ante o inicio da campaña estival, Sanxenxo, onde se crearon 224 empregos ao longo do último mes. A caída é importante tamén en Marín, con 118 parados menos, e en Poio, con 96 menos.