Un farol da iluminación pública arrancada de raíz pola base e un coche envorcado e
convertido nun amasillo de ferros sobre a calzada. Esa impactante escena daba conta onte do espectacular accidente rexistrado na PO-531 á altura de Curro , en Barro, pouco despois do mediodía. Un Renault Clio ocupado por dous veciños da parroquia de Lérez, en Pontevedra, que circulaba en dirección á capital saíuse da calzada, impactou contra o farol e acabou dando varias voltas de campá. A peor parada é a acompañante, J. M. T., que se atopa hospitalizada en estado grave no CHUVI.
O sinistro ocorreu ao redor da un do mediodía. Por causas que se descoñecen, o condutor, J. M. M., perdeu o control do turismo á saída dunha curva en dirección a Pontevedra ata dar varias voltas de campá. A colisión co poste da iluminación foi de tal violencia que o arrincou de raíz, incluída a base de formigón coa que estaba apontoado.
De inmediato, axentes da Garda Civil de Tráfico, efectivos de Bombeiros do Salnés e persoal médico do 061 desprazáronse ao lugar dos feitos para auxiliar á parella. O home logrou saír pola fiestra do vehículo e presentaba varias feridas, aínda que o seu prognóstico non parecía revestir perigo.
Foi a muller a que levou a peor parte, ao parecer debido a que sufriu un forte impacto na cabeza cando o coche deu as volta de campá. Os bombeiros tiveron que usar ferramentas para sacala do automóbil, mentres os sanitarios atendíana. Finalmente, levárona a Montecelo para posteriormente ser trasladada ao longo da tarde ao servizo de neurocirugía do CHUVI, en Vigo, onde permanece en estado grave por mor dun traumatismo cranioencefálico, segundo fontes sanitarias.
Durante algo máis dunha hora, axentes do destacamento de Tráfico da Garda Civil regularon a circulación de vehículos e improvisaron un acceso en dirección a Pontevedra pouco antes da ITV mentres os operarios retiraban o coche da calzada e limpaban os restos do sinistro.
NOTICIAS DE BARRO 