Os alcaldes de Portas, Caldas, Moraña, Cuntis e Barro asinaron onte, durante un acto que tivo lugar no Mercantil de Caldas, o manifesto onde se recollen as diferentes peticións da recentemente creada plataforma de afectados polas subordinadas e preferentes do Umia.

Apostar por que se produza un troco das subordinadas ou preferentes por un depósito a prazo fixo ou por diñeiro líquido “en caso de necesidade urxente”, que os afectados titulares de créditos hipotecarios poidan suprimir a súa débeda polo importe desembolsado no seu día para a compra destes “produtos tóxicos” ou a “cancelación inmediata de todos os créditos persoais que se concederon aos prexudicados como medio de devolución”, son as diferentes iniciativas que foron secundadas polos cinco regidores.

Reunión con Louzán

Por outra banda, os alcaldes asistentes acordaron solicitar unha reunión co presidente da Diputación, Rafael Louzán; cita á que acudirían acompañados por varios representantes da plataforma. Celebrar “un foro aberto” en Caldas no que calquera veciño afectado podería expoñer as súas dúbidas e que, previsiblemente, contaría coa presenza dalgún xuíz; ou solicitar unha reunión cos dirixentes das sucursais de Novagalicia Banco da zona; foron outros dos compromisos que se alcanzaron.

Os afectados, segundo recolle o manifesto, ademais de solicitar aos alcaldes que os recoñecesen como “ahorradores e non inversores”, foron máis aló e solicitaron a estes que pelexasen pola “devolución íntegra dos aforros” e, en caso de non ser así, que “puxesen o seu cargo a disposición como medida de presión”. Ademais, pediron aos edís que se sitúen contra o Real Decreto no que se aproban quítalas, así como que “soliciten a súa derrogación”.

Por outra banda, os alcaldes comprometéronse a “aceptar como propias” estas reivindicacións, así como unirse públicamente á causa dos afectados. Neste sentido, os afectados solicitaron aos dirixentes que, ademais destas mostras explícitas de apoio, puxesen en coñecemento do resto de alcaldes da comarca estas esixencias.

Tal e como fixeron a semana pasada nos plenos de Caldas, Cuntis e Barro, os afectados acudiranse hoxe na sesión plenaria que se celebrará a partir das 21.30 horas no Concello de Moraña.