A Xunta de Galicia e os concellos da provincia de Pontevedra unirán as súas forzas para evitar que se repita unha onda de lumes forestais como os que se rexistraron no verán de 2006. O delegado territorial da Administración galega, José Manuel Cores Tourís, convocou á os alcaldes dos 28 municipios que conforman o distrito forestal XIX (Pontevedra-O Salnés-Caldas e O Morrazo) para proporles unha alianza: a firma dun convenio para pór en marcha brigadas de prevención e defensa contra os incendios forestais durante os meses de maior risco de lume (desde o 1 de xullo ata o 30 de setembro).
No encontro, que se desenvolveu no salón de actos do edificio administrativo de Campolongo, tamén participaron o xefe territorial de Medio Rural e de Mar, Gerardo Zugasti, e o xefe do Servizo de Prevención e Defensa Contra Incendios Forestais, Manuel Francisco Gutiérrez.
Tourís presentou aos representantes das administracións municipais un convenio “que pon en marcha a Consellería de Medio Rural e de Mar e que permitirá a contratación de brigadas formadas por catro, cinco e seis persoas, tendo en conta que estes equipos humanos e materiais serán financiados nun 75% pola Administración autonómica e, o 25% restante, será asumido polos propios municipios”. A Xunta anticipará a cantidade correspondente aos labores de extinción e vixilancia tras a firma do convenio, mentres que, no caso da axuda para os traballos de prevención, tramitará o seu pago despois de que cada concello presente a correspondente xustificación.
Segundo o acordo proposto polo delegado territorial da Xunta, os concellos que se somen a esta iniciativa comprometeranse a preparar franxas de xestión de biomasa en terreos forestais de titularidade municipal ou de propietario descoñecido. “Estes traballos -precisou- consistirán na realización de desbroces manuais, rareos e eliminación de restos nun mínimo de cinco hectáreas durante os tres meses nos que estarán operativas as brigadas, de cara a efectuar labores de prevención”.
Estes equipos tamén efectuarán labores de vixilancia e extinción. Estas actuacións concretaraas o responsable do distrito forestal correspondente e executaranse dentro do ámbito municipal (tamén noutros puntos do distrito, se resultase necesario).
Complemento. Estas brigadas complementarán a función que desenvolven os equipos previstos no operativo de loita contra o lume, organizado pola Consellería de Medio Rural e de Mar, que contará, na provincia de Pontevedra, cos mesmos medios que o ano pasado: 25 brigadas de terra; 2 equipos helitransportados; persoal propio de empresas dedicadas a este labor e 28 cuadrillas de operarios da Seaga (empresa pública de Servizos Agrarios Galegos, S.A.).
En paralelo, o citado departamento da Administración galega está a tramitar outros dous convenios cos concellos da provincia co obxectivo de mellorar a prevención e loita contra o lume.
NOTICIAS DE BARRO 