“Nin lle dan valor nin intentan incentivarlo”, explicaba onte un dos vendedores ambulantes do mercadillo cando se lle preguntaba pola situación deste. Segundo explican, existen “moitos postos vacios e, malia que hai a lista de espera, o Concello leva anos sen outorgar unha nova licenza”. “E non sabemos por que”, engaden.

Ademais, o colectivo expresa o seu malestar coa Concejalía de Promoción Económica pola feira denominada “Stock Pontevedra” que, xunto aos comerciantes da cidade, organizou no Recinto Ferial o primeiro fin de semana de febreiro.

“Non se pode organizar unha feira do stock no Recinto Ferial. Para vender neste mercadillo teño que pagar unha taxa municipal, si quero montar un negocio teño que pagar outra, pero entón, por que eles si poden vir aquí a vender?”, argumenta Javier Loureiro, un dos comerciantes ambulantes da rúa Rafael Areses.

No entanto, todos coinciden no que o declive deste evento comezou no ano 2005, cando unha disputa entre o goberno local e un grupo de vendedores, na súa maioría de etnia xitana, concluíu coa marcha destes a Barro, lugar onde atoparon unha alternativa á capital.

“Entón viña moita máis xente”, recorda María García, outra das comerciantes. “Gustaríanos que estes comerciantes volvesen, sempre que paguen os impostos como nós”, detalla.

Os intentos municipais para tratar de revertir a situación remóntanse a xaneiro de 2009, cando se modificaron as datas de celebración cambiando os tradicionais días 1, 8, 15 e 23 de cada mes polos sábados, unha variación que pretendía, ademais de atraer a máis público, favorecer a actividade económica no centro histórico. Isto veu acompañado por un cambio de ubicación e os vendedores pasaron de establecer os seus postos nas explanadas superiores da Xunqueira á colindante rúa Rafael Areses. Con todo, ningún destes cambios serviu para reactivar a actividade do mercadillo.

Chove sobre mollado

“Levamos tres fins de semana con choivas”, lamentaba outro dos vendedores. “O 60% das nosas vendas prodúcense os sábados e domingos. As últimas choivas matáronnos. É peor que a crise. Esta apértache, pero traballando sempre vas facendo algo, pero o temporal impídeche traballar e o posto hai que pagalo igual”, lamentaban.

Así pois, para os comerciantes ambulantes chove sobre mollado, xa que desde que comezase a crise moitos recoñecen sufrir un descenso das vendas en máis dun 50%.

Neste sentido, os propios clientes recoñecen que antes de 2005, ademais de que entón a afluencia de público era moito maior, podíanse atopar produtos de calidade e baratos.”Agora seguen sendo económicos, pero son moito peores”, aseguran algúns das persoas consultadas.