Un ano e 11 meses de prisión por un delito de coaccións e outros 8 meses por ameazas leves de xénero é a condena imposta polo Xulgado do Penal número 4 da Coruña a un veciño do municipio pontevedrés de Barro polas continuas chamadas telefónicas que efectuou á muller que fora a súa parella, que sumaron 890 no período de 55 días e que alcanzaron mesmo as 134 en menos de 9 horas.

A sentenza considera probado que o condenado, de 62 anos, non asumiu o final da relación sentimental que mantivera entre agosto de 2008 e febreiro de 2010 cunha muller, polo que buscou o pretexto de solicitarlle a devolución dunha cantidade de diñeiro para despregar unha actitude persistente e obstinada co fin de molestar á súa antiga parella.

A partir do 4 de marzo de 2010, o home comezou a chamar de forma persistente ao teléfono móbil da muller, primeiro cunhas cantas veces ao día, pero a medida que transcorría o tempo, o número de chamadas incrementouse, de forma que nos dous meses que mantivo esta actitude houbo cinco xornadas nas que efectuou máis dun centenar. O fallo xudicial aclara que a maioría destas chamadas non foron atendidas pola destinataria, coa que o 13 de abril conseguiu contactar para insultala e ameazala con mandala matar por medio doutra persoa a cambio de pouco diñeiro por negarse a pagarlle unha suposta débeda de 600 euros.

Centro de traballo

Outro dos feitos que se atribúen ao condenado foi a súa visita ao centro de traballo da muller, unha fábrica téxtil do polígono de Sabón, onde se entrevistou coa xefa da vítima e solicitou que a despedisen da empresa porque era unha mentireira e unha ladroa, así como que el quería foderlle a vida e deixala sen traballo.

A denuncia interposta por mor desta actuación conseguiu que o 4 de maio de 2010 o Xulgado de Violencia sobre a Muller ditase unha orde de afastamento contra o home, ao que se prohibiu aproximarse a menos de 200 metros da vítima, do seu domicilio ou do seu posto de traballo, así como establecer comunicación con ela mediante calquera medio.

Na sentenza recóllese que durante o proceso o acusado admitiu realizar numerosas chamadas co fin de reclamar o pago da débeda. O fallo tacha ademais de categórico a listaxe das chamadas efectuadas polo home e manifesta que o seu contido ía máis aló de pedir que se lle devolvese unha cantidade de diñeiro, dada a intensidade das mesmas.

Para o xuíz, as chamadas buscaban que a relación sentimental renovásese e o seu efecto xerou na muller un estado de acoso e control que non a permitía sentirse segura. Ademais das condenas de prisión, o fallo impón ao home unha pena de 2 anos de afastamento da muller.

O tribunal absolve no entanto ao condenado dos delitos de violencia de xénero de carácter psíquico e trato degradante, así como do de ameazas graves, polos que a acusación particular solicitaba senllas condenas de 2 anos de prisión.