Barro -Meis deixará de ser en breve un deserto industrial icona da crise. Unha empresa que produce encofrados para prefabricados de formigón será a primeira en instalarse sobre unha parcela duns 2.500 metros. A previsión é que Caenor (Caldereirías e Estruturas do Noroeste) poida funcionar en decembro e que cre os primeiros dez empregos.

As obras da nave desta firma -que pagou 260.000 euros pola parcela pensando na súa localización estratéxica xunto á AP-9 e a autovía do Salnés, segundo sinalou a súa propietaria, Enma Medrano- foron visitadas onte por responsables da Deputación e de concellos próximos. Ata Barro Meis desprazáronse o presidente do ente provincial, Rafael Louzán, o vicepresidente José Juan Durán, o alcalde de Barro , José Antonio Landín Eirín e o delegado da Xunta, José Manuel Cores.

Louzán declarouse «moi satisfeito» de que Barro -Meis conte «coa primeira criatura» e sinalou que o Concello tramita xa a aprobación doutros tres expedientes máis para outras tantas empresas. O presidente da Deputación mostrouse esperanzado en que o polígono, que xa recibiu 20 millóns de investimento, sirva de trampolín para a creación de emprego en Barro , Pontevedra, Caldas e O Salnés cando se produza a saída da crise. De momento, as empresas que desexen instalarse poderán aprazar ata cinco anos un 75% dos pagos. Hai unhas 50 parcelas aínda por vender.