Quince colexios, asociacións e entidades da comarca de Pontevedra participarán o próximo curso 2010-2011 noprograma ambiental Voz Natura. O consumo responsable da auga será o eixo das actividades a desenvolver polos alumnos na décimo cuarta edición deste programa que desenvolve a Fundación Santiago Rei Fernández-Latorre. O obxectivo dos proxectos será a preservación e aforro dun recurso natural tan valioso como escaso, tanto no ámbito doméstico como industrial, así como a protección dos ecosistemas fluviais e mariños, sen esquecer outras propostas de acción directa sobre o medio natural galego.

. A asociación ecoloxista Vaipolorío traballará na posta en valor das fontes e bocaminas do río dous Gafos, incidindo na súa limpeza, catalogación, sinalización das mesmas e recuperación da súa toponimia tradicional con letreiros de madeira que se integran perfectamente na contorna. O seu proxecto leva por título Auga para a vida, tendo en conta que se trata dun hábitat cunha riqueza especifica de flora e fauna e que as súas augas son utilizadas como remedio para algunhas doenzas.

. O Colexio Amor Ruibal de Barro englobará no seu proxecto diversas propostas baixo os títulos do noso río, Club de sendeirismo Mimi, Recuperamos o colexio, Os invasores verdes e Obradoiro de agricultura biodinámica.