A crise que afecta aos investimentos de Fomento xa ten a súa primeira tradución nas Rías Baixas: Fomento optou por facer caso omiso das demandas do BNG e negouse a rebaixar os prazos para construír o tramo de autovía Pontevedra-Curro . Este tramo vai desde Pilarteiros (na estrada de Campo Lameiro) ata o nó da AP-9 que dá acceso á autovía de Sanxenxo.

A deputada do BNG Olaia Fernández Davila reclamara en marzo nunha pregunta no Congreso que Fomento axilizase os prazos para esta autovía despois de que se coñecese (ver La Voz do pasado 2 de febreiro) que habería que esperar polo menos ata o 2017 pola súa construción. Davila considerou este prazo «de xeito evidente excesivo» e en sentido similar pronunciouse en varias ocasións o alcalde de Pontevedra, Miguel Fernández Lores.

A resposta do departamento que dirixe José Blanco, dada a coñecer onte, evita comprometer calquera rebaixa de prazos e limítase a fixar os trámites que seguen todo este tipo de proxectos. De momento, a autovía Pontevedra-Curro está en estudo informativo e, unha vez finalizado, virán a exposición pública e a declaración de impacto a cargo de Medio Ambiente como paso previo á redacción do proxecto.

Non ratifica o 2017

Fomento nin sequera ratifica na súa resposta aos seus socios orzamentarios o prazo do 2017 que o propio ministerio fixara anteriormente nos condicionantes para a redacción do estudo informativo, adxudicado finalmente á empresa TRN Enxeñería e Planificación en 381.335 euros.

Un destes condicionantes esixía unha prognosis de tráfico da nova autovía a realizar a partir da súa entrada en servizo que, segundo dicía textualmente, o documento, «estimarase en cinco anos a partir da entrega do estudo informativo». Se a estes cinco anos, engádense os dous que consumirá o estudo informativo, a data de entrada en servizo demoraríase polo menos ata o 2017.

Este prazo é, no entanto, o máis optimista entre os que se están barallando. Outras estimacións apuntan, en base á experiencia dos últimos anos e aos múltiples trámites que habería que superar, que non é arriscado pensar que haxa que agardar polo menos ata o 2018. O escenario de crise económica engade ademais novos interrogantes sobre os prazos para abordar a realización desta autovía.

O portavoz municipal do PP, Telmo Martín, asegurou recentemente que haberá que esperar ata o 2010 para que poida entrar en funcionamento. Os dous tramos da A-57 que preceden ao traxecto Pilarteiros-Curro serán licitados este ano.