A iniciativa nacionalista no Congreso asegura que o AVE terá un «impacto brutal» en Porráns e Coruto tanto desde o punto de vista estético como visual. Destaca ademais o efecto barreira que terá nesta poboación a construción de dous viadutos.

Unha das opcións para evitar o forte impacto do AVE na zona sería unha «baixada de nivel» para a conexión co eixo atlántico. A outra pasa por introducir «modificacións no trazado» como a dun acceso máis directo a Pontevedra.

Fernández Davila asegura que a decisión adoptada por Fomento xerou «unha gran alarma» entre os veciños afectados que non entenden que se optou pola fórmula dos dous viadutos no canto de prolongar o túnel anterior.

Alegacións sen resposta

Pero a deputada quere que o ministerio explique tamén por que o ministerio non respondeu as alegacións do Concello de Barro e dos veciños antes de ser aprobado o informe de impacto ambiental. A este respecto, pide que o Goberno indique se as tivo en conta e se está disposto a darlles resposta. Ademais, esixe que explique as razóns das decisións adoptadas.

As dúas iniciativas do BNG concrétanse en preguntas por escrito, unha fórmula que en condicións normais fará que Fomento responda nun prazo aproximado de dous ou tres meses. A fórmula escrita presenta a vantaxe de que queda inmediata constancia do informe do ministerio, pero non suscita debate oral.