O BNG de Barro instou onte ao Concello a que amplíe o recinto escolar do CEIP Amor Ruibal. Os nacionalistas recordaron que hai un ano o pleno do Concello aprobara por unanimidade unha proposta do Bloque para que se acometese unha reforma integral do centro, que incluíse a mellora da accesibilidade e da seguridade, tanto no propio colexio como no recinto educativo.

«Pasado un ano, nin ou Concello nin a Consellería de Educación fixeron nada para dar cumprimento ao acordo», remachou o BNG. Este partido sinalou que un dos puntos máis significativos era a consecución dunha área de recreo de, como mínimo, 1.000 metros cadrados para que os nenos poidan contar cunha zona acorde ás súas necesidades. Os nacionalistas consideran que a ampliación é «imprescindible» e por iso volveron presentar unha moción para que se adopten as medidas urbanísticas necesarias.