Tras varios anos de tensións, Xunta e Deputación acadaron un acordo sobre o supernudo de Curro que debe enlazar a autovía de Sanxenxo, a futura autovía a Vilagarcía, a AP-9 e, por extensión, ao futura autovía A-57 a Pontevedra. Segundo indicou onte o presidente do organismo provincial, Rafael Louzán, o deseño do maior cruzamento de comunicacións do norte da provincia será presentado en próximos días en Pontevedra por Agustín Hernández, conselleiro de Medio Ambiente, Territorio e Infraestruturas (MATI).
O maior punto de fricción entre Deputación e o anterior Goberno bipartito centrábase na invasión de terreos que implicaba a construción da macrorotonda para enlazar as dúas autovías coa AP-9, invasión que afectaba de cheo ao polígono industrial de Barro-Meis.
Entre un 30 e un 40% da superficie segunda fase do polígono, a construír en Meis, ía ser devorada ou se ía ver afectada polo macroenlace, segundo os datos achegados onte. Ademais, quedaban sen definir entradas e saídas directas ao polígono. Tamén quedaba sen resolver o problema do paso pola poboación de Curro do tráfico local que xerarán as estrada locais de Cambados, Vilanova e Vilagarcía, unha vez que se constrúa a autovía a Baión.
As opcións alternativas baralladas pola Deputación -na etapa en que Agustín Hernández dirixía o departamento de Infraestruturas do ente provincial- mereceron no pasado mandato o rexeitamento de Política Territorial ao entender que se vería afectada a praia de peaxes da AP-9.
Cambios no deseño
Nada máis cambiar o Goberno, o novo conselleiro paralizou as expropiacións e anunciou unha redefinición do proxecto, malia que a obra xa estaba adxudicada. A solución de Hernández, que vai ser presentada en breve, supoñerá un «beneficio importante» e dará «ou mesmo servizo ou maior», asegurou onte Louzán. Ademais, haberá unha «menor extensión afectada» e os veciños de Curro van ver «un pouco cumpridas» as súas demandas en relación cos accesos ao polígono.
Estas demandas non eran outras que conseguir que o tráfico industrial non pasase pola poboación de Curro. O presidente da Deputación dixo onte que a solución adoptada permitirá que Barro-Meis «teña unha mellor entrada e unha mellor saída» e sostivo que «todos saímos todos gañando con esta nova redefinición».
Os veciños, pola súa banda, aseguran que en contactos previos se prometeulles sacar de Curro o tráfico industrial e o das estradas locais, pero que queren velo «nos papeis».