Argumenta que AP-9 e a futura autovía A-57 non son suficientes para recoller o intenso tráfico local da zona

Política Territorial ofrece aos veciños construír pasos subterráneos para minorar o impacto da ampliación

O proxecto para desdobrar a PO-531 entre Pontevedra e Curro non irá parar ao cesto dos papeis como pedía unha comisión de veciños afectados pola futura obra. A Xunta deixou onte claro que non paralizará a actuación, actualmente sometida a información pública. Argumenta que a AP-9 e a futura prolongación da autovía A-57 ata Curro non son suficientes para recoller o intenso tráfico local que transita pola estrada entre Pontevedra e Vilagarcía.

Tras hora e cuarto de entrevista cunha comisión veciñal, a delegada de Política Territorial en Pontevedra, Isabel Domínguez Quintas, deixou clara a posición da Xunta de continuar adiante co proxecto, aínda que ofreceu aumentar a permeabilidade da futura vía con máis pasos subterráneos e elevados. Tamén se prevé intensificar a reposición de servizos, pero «tratando sempre de que non sexa incompatible a seguridade viaria cos usos residenciais».

Isabel Domínguez sinalou que a actual estrada PO-531 «parte xa» as parroquias afectadas, entre elas, Campañó, Alba-A Devesa, A Portela e Fachendoso. En consecuencia, a división destes territorios non sería unha novidade derivada do actual proxecto de desdobramento.

Tamén dixo que tanto a Xunta como Fomento apostan por levar a A-57 desde Lérez (cruzamento coa estrada de Campo Lameiro) ata Curro, pero que a futura autovía «non vai a ser unha alternativa para vos tráficos de curto percorrido». «Vos tráficos pesados que vaian a ter entrada en Pontevedra van seguir a empregar esa estrada [a PO-531 a Vilagarcía] por ser moito máis curta que percorrer toda unha vía alternativa de alta capacidade», advertiu.