O debate sobre o transporte de pacientes críticos instalouse no Salnés. Desde que a semana pasada os técnicos do 061 denunciasen que se están transvasando accidentados e enfermos graves dunha ambulancia a outra en lugares como a gasolineira de Meis ou o nó de Curro , o asunto incorporouse de forma inesperada á axenda política, cando as principais formacións quentan motores para as municipais de maio. Abriu fogo o BNG, apoiando aos traballadores e alertando da situación cunha moción plenaria e unha próxima intervención no Parlamento galego. E a continuación sumáronse Esquerda Unida, o PSOE e finalmente incluso o PP, a través do rexedor vilagarcián, Tomás Fole, quen recoñecía o sábado que existen claros indicios de que a comarca necesita un vehículo de soporte vital avanzado. O dato obxectivo achegábano onte fontes do Servizo Galego de Saúde en Pontevedra: o ano pasado, a única ambulancia deste tipo que cobre a área norte da provincia trasladou a 600 persoas ao complexo provincial desde Arousa.

Esta cifra, que a grandes liñas se mantén estable desde hai anos, supón que cada día O Salnés xera practicamente dous traslados de pacientes en estado crítico. Fundamentalmente, vítimas de accidentes e infartos. O Sergas considera, con todo, que a creación dunha base permanente para unha ambulancia medicalizada (o servizo refórzase no verán cun vehículo avanzado en Sanxenxo, aínda que o seu período de funcionamento reduciuse de tres meses a un e medio) non se xustifica en terras de Arousa. Así o apuntaron os responsables da política sanitaria en Galicia, ao fío da controversia xerada pola transferencia en gasolineiras e rotondas, defendendo que a rede de transporte de urxencias responde a criterios de demanda e poboación, pero tamén á distancia existente con respecto aos hospitais de referencia.

A proximidade a Pontevedra sempre funcionou, tanto neste caso como no debate sobre a creación dunha unidade de coidados intensivos no hospital comarcal, como un argumento de freo para o desembarco deste tipo de servizos. A lectura demográfica, no entanto, é contundente. Esa única ambulancia medicalizada cobre desde Pontevedra unha área que, entre a capital provincial e a súa contorna, o territorio do Salnés, Caldas e A Estrada, que o 061 engloba a efectos prácticos en Arousa, alcanza os 300.000 habitantes.

¿Ve normal que se cambien pacientes de ambulancia en gasolineiras?

Para expresar a súa opinión, o lector pode entrar na dirección http://www.lavozdegalicia.es/opina/arousa.